කුකුළු මස් මිල ඉහළ යාම පාලනය කිරීම මෙන්ම දැනට පවතින බිත්තර හිඟය අවම කරලීම සඳහා දේශීය කුකුළු කර්මාන්තකරුවන්ගේ එකඟතාවයන් සහිත යෝජනාවලියක් ලබන සතියේ අමාත්ය මණ්ඩලය වෙත ඉදිරිපත් කරන බව කෘෂිකර්ම අමාත්ය මහින්ද අමරවීර මහතා පවසනවා.
අමාත්යවරයා මේ බව සඳහන් කළේ කුකුළු නිෂ්පාදන කර්මාන්තයේ යෙදී සිටින කර්මාන්තකරුවන් සමග අද (09) කෘෂිකර්ම අමාත්යාංශයේ පැවති සාකච්ඡාවේදී යි.
රජය විසින් දේශීය කුකුළු නිෂ්පාදන කර්මාන්තය ආරක්ෂා කර ගැනීම සඳහා ප්රමුඛත්වය ලබා දී කටයුතු කළ ද මේ වනවිට රට තුළ කුකුළු මස් මිල සීග්රයෙන් ඉහළ ගොස් තිබෙනවා. එමෙන්ම බිත්තර හිඟයද මෙතෙක් විසඳී නැහැ.
මේ හේතුවෙන් පාරිභෝගිකයා ආරක්ෂා කිරීම මෙන්ම රටේ ජනතාවගේ පෝෂණ තත්ත්වයන් ආරක්ෂා කිරීම ද රජයේ වගකීමක් බවයි අමාත්යවරයා සඳහන් කළේ.
එබැවින් කුකුළු මස් මිල පාලනය සඳහා උපරිම සිල්ලර මිලක් පැනවීමටත්, අවශ්ය වුවහොත් පිටරටින් කුකුළු මස් ආනයනය කිරීමටත් රජය සාකච්ඡා කර ඇතැයි අමාත්යවරයා සඳහන් කළා.
දැනට කුකුළු මස් කිලෝවක මිල රුපියල් 1300ක පමණ අගයක පැවතුන ද මාස තුනක් තුළ එම මිල රුපියල් 1200ක් දක්වා අවම කළ හැකි බවයි මෙහිදී කුකුළු නිෂ්පාදන කර්මාන්තකරුවන් කියාසිටියේ.
මෙම මිල අවම කිරීම සඳහා කෘෂිකර්ම අමාත්යාංශය සමග ගිවිසුමකට එළඹීමට වුව ද හැකි බව එම කර්මාන්තකරුවන් ප්රකාශ කර තිබෙනවා.
කෙසේ වුවද මෙම සාකච්ඡාවේ දී එළඹි තීරණ සම්බන්ධ තොරතුරු සහිත වාර්තාවක් ලබන සතියේ රැස්වන අමාත්ය මණ්ඩලය වෙත ඉදිරිපත් කරන බවයි අමාත්ය මහින්ද අමරවීර මහතා සඳහන් කළේ.
ඩොලරයට සාපේක්ෂව රුපියලේ අගය ඉහළ යාම හා එහි වාසිය පාරිභෝගික ජනතාවට ලබා දීමට කටයුතු කරන ලෙස ද අමාත්යවරයා ඉල්ලීමක් කරනු ලැබුවා.
මෙම කර්මාන්තය ආරක්ෂා කර ගැනීම සඳහා රජය අවශ්ය සහන ලබා දුන්නද එහි වාසිය පාරිභෝගික ජනතාවට ලැබී නොමැති බවයි ඔහු සඳහන් කළේ.
එබැවින් ලබන සතියේ අමාත්ය මණ්ඩල සාකච්ඡාවේ දී කුකුළු මස් මිල ඉහළ යාම හා බිත්තර හිඟය සම්බන්ධව රජය විසින් දැඩි තීන්දු තීරණ කිහිපයක් ගනු ඇතැයි ද අමාත්යවරයා ප්රකාශ කර තිබෙනවා.
අවශ්ය වුවහොත් දැඩි නීති රීති මත හෝ කුකුළු මස් මිල ඉහළ යාම වැළැක්වීමට පියවර ගන්නා බවයි ඔහු අවධාරණය කළේ.
කාලගුණික හේතුන් මත මේ දිනවල මත්ස්ය කර්මාන්තය ද අඩාල වී ඇති අතර එබැවින් කුකුළු මස්වලට ඇති ඉල්ලුම ඉහළ ගොස් තිබෙන බව මහින්ද අමරවීර මහතා පෙන්වා දුන්නා.
