ඉන්දියාවෙන් කුකුළු මස් ආනයනය කිරීමට අදාළ සාකච්ඡාවක් ලබන සඳුදා පැවැත්වීමට නියමිතව තිබෙනවා.
වෙළෙඳ අමාත්‍යාංශයේ නිලධාරීන්, කෘෂිකර්ම අමාත්‍යාංශයේ නිලධාරීන්, කුකුල් මස් නිෂ්පාදකයින්, සංගම් නියෝජිතයන් සහ අනෙකුත් පාර්ශවකරුවන් අතරයි මෙම සාකච්ඡාව පැවැත්වීමට නියමිතව ඇත්තේ.
ඉන්දියාවෙන් කුකුළු මස් ආනයනය කිරීම සම්බන්ධයෙන් සඳුදා පැවැත්වෙන සාකච්ඡාවෙන් පසු අවසන් තීරණයක් ගන්නා බව වෙළෙඳ අමාත්‍ය නලින් ප්‍රනාන්දු මහතා ප්‍රකාශ කර තිබෙනවා.
දේශීය නිෂ්පාදකයින්ට කුකුල් මස් කිලෝග්‍රෑමයක් රුපියල් 850කට අලෙවි කිරීමට හැකියාව තිබුණද පාරිභෝගිකයින්ට එම ප්‍රතිලාභය හිමි නොවන බවයි අමාත්‍යවරයා ප්‍රකාශ කළේ.
දේශීය වෙළෙඳපොළේ මිල ඉහළ යාම හේතුවෙන් මාස කිහිපයක සිට ශ්‍රී ලංකාව ඉන්දියාවෙන් බිත්තර ආනයනය කිරීම ද සිදු කරනු ලබනවා.
මේ අතර හම සහිත කුකුළු මස් කිලෝවක් රුපියල් 1250ක මිලකට අද(2) සිට සුපිරි වෙළෙඳසැල්වල අලෙවි කිරීමට කුකුළු මස් නිෂ්පාදන කර්මාන්තකරුවන්ගේ සංගමය එකඟතාවය පළ කළ බව කෘෂිකර්ම අමාත්‍යාංශය ප්‍රකාශ කළා.
කුකුළු මස් හා බිත්තර මිල අඩු කිරීම සම්බන්ධව සාකච්ඡාවක් කෘෂිකර්ම අමාත්‍ය මහින්ද අමරවීර මහතාගේ ප්‍රධානත්වයෙන් එම අමාත්‍යාංශයේ දී පැවැත් වුණා.
ඊට කුකුළු මස් නිෂ්පාදනය කරන සියලුම කර්මාන්තකරුවන් මෙන්ම මහා පරිමාණ වශයෙන් බිත්තර නිෂ්පාදනය කරන කර්මාන්තකරුවන් ද එක්ව සිටියා.
බිත්තර මිල පාලනය සඳහා තවත් බිත්තර මිලියන 91ක් ඉන්දියාවෙන් ආනයනය කිරීමට අමාත්‍ය මණ්ඩලය අනුමැතිය ලබා දී ඇති බව කී අමාත්‍යවරයා අවධාරණය කළේ කුකුළු මස් මිල ද අඩු නොකළහොත් පාරිභෝගිකයින් ආරක්ෂා කර ගැනීම සඳහා කුකුළු මස් ද ඉන්දියාවෙන් ආනයනය කිරීමට රජයට සිදුවන බවයි.
කුකුළු මස් හා බිත්තරවලින් රට ස්වයංපෝෂිත වුවද බිත්තර හා කුකුළු මස් මිල ඉහළයාම රටේ ප්‍රෝටීන අවශ්‍යතාවයට ගැටළුවක් වී තිබෙන බවත් එම නිසා මෙම කර්මාන්තය ආරක්ෂා කර ගැනීමට නම් අනිවාර්යයෙන්ම බිත්තර මිල හා කුකුළු මස් මිල අඩු කළ යුතුව ඇති බවයි අමාත්‍යවරයා පෙන්වා දුන්නේ.
ඒ අනුව අද සිට හම සහිත කුකුළු මස් කිලෝවක එකක මිල රුපියල් 1250 දක්වා අඩු කිරීමට එකඟත්වය පළ කර තිබෙනවා.
කිසියම් සුපිරි වෙළෙඳසැලක් ඊට වැඩි මිලට අලෙවි කරන්නේ නම් 0712732679 අංකය මගින් කුකුළු මස් නිෂ්පාදන කර්මාන්තකරුවන්ගේ සංගමයේ අජිත් වීරසිංහ මහතාට දැනුම් දෙන ලෙසයි පාරිභෝගිකයින්ගෙන් ඉල්ලා සිටින්නේ.
