සංචාරක නවසීලන්තය සමගින් පැවැත්වෙන ක්‍රිකට් තරගාවලිය සඳහා ක්‍රීඩාලෝලීන් හට ප්‍රවේශ පත්‍ර අලෙවි කිරීම ගැන ශ්‍රී ලංකා ක්‍රිකට් ආයතනයෙන් නිවේදනයක් නිකුත් කර තිබෙනවා.
එම නිවේදනයේ දැක්වෙන්නේ; මෙම තරගාවලිය නැරඹීම සඳහා අවශ්‍ය ප්‍රවේශ පත්‍ර මාර්ගගත ක්‍රමය (ඔන්ලයින්) ඔස්සේ නොවැම්බර් 6 වනදා සිට ආරම්භ කරන බවයි.
https://srilankacricket.lk/ වෙබ් අඩවියට පිවිසීමෙන් අදාළ ප්‍රවේශපත්‍ර මිල දී ගැනීමට එදින සිට අවස්ථාව ක්‍රීඩා ලෝලීන් හට හිමිවනු ඇති.
එමෙන්ම කොළඹ 07 විද්‍යා මාවතේ සහ දඹුල්ල ක්‍රිකට් ක්‍රීඩාංගණයේ ස්ථාපිත ප්‍රවේශ පත්‍ර කවුළු ද නොවැම්බර් 07 වනදා සිට විවෘත කෙරෙන බව ද වාර්තා වනවා.
පන්දුවාර 20 තරගාවලිය පැවැත්වෙන දිනවල දී දඹුල්ල ක්‍රිකට් ක්‍රීඩාංගණයේ ප්‍රධාන ගේට්ටුව අසලින් ද ප්‍රවේශපත්‍ර මිලදී ගත හැකියි.
නොවැම්බර් 15 වනදා සිට පල්ලෙකැලේ ක්‍රීඩාංගණයේ දී ද ප්‍රවේශපත්‍ර අලෙවි කෙරෙන අතර එක්දින තරග පැවැත්වෙන දිනවල දී බලගොල්ල අභීත ක්‍රීඩා පිටියේ දී ද ප්‍රවේශපත්‍ර මිල දී ගත හැකි බවයි ශ්‍රී ලංකා ක්‍රිකට් ආයතනය පැවසුවේ.
ප්‍රවේශ පත්‍ර කවුළු උදෑසන 9 සිට සවස 5 දක්වා විවෘත ව තැබෙනවා.
තරග පැවැත්වෙන දිනයන්හි දී උදෑසන 9 සිට සවස 8 දක්වා මෙම ප්‍රවේශ පත්‍ර කවුළු විවෘත ව තැබෙනු ඇති.
