පෑලියගොඩ ප්‍රදේශයේ පසුගියදා පැවති අවුරුදු උත්සවයක් අවසානයේ පැවති සංගීත සංදර්ශනයක් අතරතුර වේදිකාවේ නර්තනයේ නිරත වූ පොලිස් කොස්තාපල්වරයෙකුගේ වැඩ තහනම් කර තිබෙනවා.
පෑලියගොඩ පොලිස් ස්ථානයට අනුයුක්තව සේවය කරන කොස්තාපල්වරයා රාජකාරියේ යෙදී සිටියදී මෙලෙස හැසිරීම හේතුවෙන් කළ පරීක්ෂණයකින් අනතුරුවයි කැලණිය සහකාර පොලිස් අධිකාරීවරයා විසින් මෙලෙස වැඩ තහනම් කර ඇත්තේ.
සංගීත සංදර්ශනය පැවැත්වෙන ස්ථානයේ ආරක්ෂක රාජකාරි සඳහා අදාළ නිලධාරියා ඇතුළු සැරයන්වරයෙකු සහ පොලිස් කොස්තාපල්වරුන් සිව් දෙනෙකු යොදවා තිබූ බව සඳහන්.
සංගීත සංදර්ශනය මධ්‍යම රාත්‍රිය වන විට අවසන් කරන ලෙස සංවිධායකයන්ට දැනුම් දී තිබුණද අමතර පැය භාගයක කාලයක් ප්‍රසංගය පැවැත්වීමට පොලිස් නිලධාරීන් විශේෂ අවසරයක් ලබාදී තිබුණා.
වේලාව අවසන් වීමට ආසන්නව, අදාළ පොලිස් කොස්තාපල්වරයා වේදිකාවේ සංගීත කණ්ඩායම සමඟ කතා කරමින් සිටි අතර පසුව ඔහු වේදිකාවේ නර්තනයේ නිරත වී ඇති බවයි හෙළිවී ඇත්තේ.
මෙම කොස්තාපල්වරයා තමා කැමතිම ගීතය ගායනා කරන ලෙස සංගීත කණ්ඩායමෙන් ඉල්ලා සිටි අතර සංගීත කණ්ඩායමට සංදර්ශනය අවසන් කිරීමට ඉඩ නොතබමින් දිගින් දිගටම නර්තනයේ යෙදීම නිසා සංවිධායකයින් විසින් පොලිස් කොස්තාපල්වරයා වේදිකාවෙන් ඉවත් කර ඇති බව විමර්ශනවලදී අනාවරණය වී තිබෙනවා.
සිද්ධිය සම්බන්ධයෙන් පොලිස් ස්ථානාධිපතිවරයා දැනුවත් කිරීමට ප්‍රසංගයේ ආරක්‍ෂාව භාර සැරයන්වරයා පියවර ගෙන ඇති අතර අනතුරුව විමර්ශනයක් සිදු කිරීමෙන් පසුවයි සහකාර පොලිස් අධිකාරීවරයා ඊට සම්බන්ධ පොලිස් කොස්තාපල්වරයාගේ වැඩ තහනම් කර ඇත්තේ.
