කැනඩාවේ ටොරොන්ටෝ නගරයේ මහල් නිවාස සංකීර්ණයක සිදුවූ වෙඩි තැබීමකින් පුද්ගලයන් 5 දෙනෙකු ජීවිතක්ෂයට පත්ව තිබෙනවා.
වෙඩි තැබීමට සම්බන්ධ සැකකරු පොලිසිය වෙඩි තබා ඝාතනය කර ඇති බවයි විදෙස් මාධ්‍ය වාර්තා කළේ.
තුවාල ලැබූ අයෙකු බරපතල තත්ත්වයෙන් රෝහල් ගත කර තිබෙනවා. වෙඩි තැබීමට හේතුවක් මෙතෙක් අනාවරණ වී නැහැ.
ප්‍රාන්ත පොලිස් ප්‍රධානියා පැවසුවේ, මහජනතාවට කිසිදු තර්ජනයක් නොමැති බවයි.
එමෙන්ම වෙඩි තැබීමේ සිද්ධියෙන් පසු ඉවත් කළ පුද්ගලයන්ට නැවත ඔවුන්ගේ නිවෙස් වෙත යා හැකි බව ද පොලිසිය ප්‍රකාශ කර තිබෙනවා.
අසල්වැසි ඇමරිකා එක්සත් ජනපදයට වඩා කැනඩාවේ වෙඩි තැබීම්වල අඩුවක් පෙන්නුම් කෙරෙනවා.
කෙසේවෙතත්, කැනඩාව මෑතකදී ගිනි අවි වර්ග කිහිපයක් තහනම් කිරීමට නීති සම්පාදනය කර තිබෙනවා.
2020 වසරේ මැයි මාසයේදී කැනඩාවේ නෝවා ස්කොටියා හි පොලිස් නිලධාරියෙකු ලෙස වෙස්වලාගත් තුවක්කුකරුවෙකු පුද්ගලයින් 22 දෙනෙකු මරා දැමීමෙන් පසු ගිනි අවි වර්ග 1,500ක් තහනම් කළා.
