උඩප්පුව කාලි දේවාලය බිඳ එහි තිබූ රන් ආභරණ සොරකම් කළ බව කියන සැකකරුවෙක් සහ ඊට අනුබල දුන් තවත් පුද්ගලයෙක් උඩප්පුව පොලීසිය විසින් අත්අඩංගුවට ගෙන තිබෙනවා.
පසුගිය 13 වනදා රාත්‍රියේ උඩප්පුව කාලි දේවාලය බිඳ එහි තිබූ රන් ආභරණ මෙලෙස සොරාගෙන ගොස් තිබූ අතර, එහිදී දේව ප්‍රතිමාවට පළඳවා තිබූ රන් දම්වැලක් ද සොරාගෙන ගොස් තිබුණා.
දේවාලයට හොර රහසේ ඇතුළු වූ පුද්ගලයා සොරකම සිදුකරන ආකාරය එහි සවිකර තිබූ ආරක්‍ෂිත කැමරාවල සටහන්ව තිබූ බවයි විමර්ශන සිදුකළ පොලිසිය සඳහන් කළේ.
එම දර්ශන ඔස්සේ සිදුකළ විමර්ශණවලින් පසුවයි සැකකරු අත්අඩංගුවට ගැනීමට පොලිසියට හැකිව ඇත්තේ.
මෙහිදී මුන්දලම ප්‍රදේශයේ පදිංචි අයෙක් අත්අඩංගුවට ගෙන ඇති අතර, ඔහුගෙන් සිදුකළ ප්‍රශ්න කිරීම්වල දී සොරකමේ සුලමුල අනාවරණය කර ගැනීමට පොලිසියට හැකිව තිබෙනවා.
මෙලෙස සොරකම් කරන ලද රුපියල් ලක්ෂ 20ක් පමණ රන් අභරණ ප්‍රධාන සැකකරුගේ සහෝදරයෙකු සතුව තිබිය දී පොලීසිය විසින් සොයා ගෙන ඇති බවයි වාර්තා වුණේ.
අත්අඩංගුවට ගැනුණු සැකකරුවන් හලාවත මහේස්ත්‍රාත්වරයා වෙත ඉදිරිපත් කිරීමට නියමිත බවයි පොලිසිය සඳහන් කළේ.
wpDiscuz
