වර්තමාන රජයේ ප්රසම්පාදන ක්රියාවලිය තුළ පවතින දැඩි මූල්ය පිරිවැටුම් (Turnover) සීමාවන් හේතුවෙන් මෙරට ප්රමුඛ පෙළේ ඉදිකිරීම් සමාගම් දැඩි අර්බුදයකට ලක්ව ඇති බව වාර්තා වනවා.
මෙම තත්ත්වය හුදෙක් ආර්ථික ගැටලුවක් නොව, ක්ෂේත්රයේ නියැලී සිටින දහස් සංඛ්යාත සේවකයින්ගේ මානසික හා කායික සෞඛ්යය කෙරෙහි ද සෘජු බලපෑමක් එල්ල කර ඇති බව විශේෂඥයෝ පෙන්වා දෙනවා.
වර්තමාන ඉදිකිරීම් ටෙන්ඩර් සුදුසුකම් ලබාගැනීම සඳහා වැඩි වාර්ෂික ලාභ ඉපයීම් පමණක් මූලික කරගනිමින් යම් ආයතනයක් සුදුසුකම් ලබනවාද නැතිද යන්න තීරණය කිරීමේ ක්රමවේදය දැඩි ලෙස ක්රියාත්මක වනවා.
එහෙත්, දිගුකාලීන ආර්ථික බාධා, මහා පරිමාණ ව්යාපෘති අඩුවීම, ව්යාපෘති ආරම්භය ප්රමාදවීම සහ ගෙවීම් චක්රවල පවතින ප්රමාදයන් හේතුවෙන් මෙම මූල්ය ඉලක්ක සපුරා ගැනීම මෙම ආයතන වලට අතිශය දුෂ්කර වී තිබෙනවා.
මෙම මූල්ය පීඩනය හේතුවෙන් ඉදිකිරීම් සමාගම්වල සේවකයින් අතර දැඩි මානසික ආතතිය, රැකියා අනාරක්ෂිතභාවය පිළිබඳ බිය සහ එමගින් ඇතිවන හෘද රෝග හා අධික රුධිර පීඩනය වැනි සෞඛ්ය ගැටලු වර්ධනය වී තිබෙනවා.
මූල්ය ස්ථාවරත්වය ගිලිහී යාම නිසා සේවක සුභසාධන කටයුතු සහ සේවා ස්ථානවල සෞඛ්යාරක්ෂිත ප්රමිතීන් පවත්වාගෙන යාම ද අභියෝගයට ලක්ව ඇත.
බොහෝ දේශීය සමාගම් සතුව වෘත්තීය නිපුණතාවය සහිත ශ්රම බලකායක්, නවීන යන්ත්රෝපකරණ සහ සංකීර්ණ ව්යාපෘති නිම කිරීමේ පූර්ණ තාක්ෂණික හැකියාව පවතින අතර, පසුගිය දශකය පුරා මොවුන් අතිශය දුෂ්කර තත්ත්වයන් යටතේ වුවද, නිසි ඉංජිනේරු ප්රමිතීන්ට අනුව මාර්ග සහ යටිතල පහසුකම් ව්යාපෘති සාර්ථකව නිම කර තිබෙනවා.
දැනට පවතින නිර්ණායක මගින් ව්යාපෘති නිම කිරීමේ පළපුරුද්ද සහ තාක්ෂණික දක්ෂතාවයට වඩා කෙටි කාලීන මූල්ය දත්තවලට වැඩි ඉඩක් ලබා දී තිබෙනවා.
මෙහි ප්රතිඵලයක් ලෙස සාධාරණ තරඟකාරීත්වයට බාධා ඇති වන අතර දක්ෂ දේශීය සමාගම් ප්රධාන ව්යාපෘතිවලින් ඉවත් වනවා.
එමෙන්ම ක්ෂේත්රයේ වෘත්තිකයන්ගේ මානසික සෞඛ්ය පිරිහීම හේතුවෙන් සමස්ත කාර්යක්ෂමතාව පහත වැටෙනවා.
එබැවින්, ඉදිකිරීම් ක්ෂේත්රයේ පැවැත්ම සහ එහි නියැලෙන ලක්ෂ සංඛ්යාත ජනතාවගේ සෞඛ්යාරක්ෂිත අනාගතය වෙනුවෙන්, මූල්ය දත්ත මෙන්ම තාක්ෂණික පූර්ව පළපුරුද්ද ද සමබරව සලකා බලන නව ප්රසම්පාදන ක්රමවේදයක අවශ්යතාවය ක්ෂේත්රයේ විද්වතුන් අවධාරණය කර සිටිනවා.
wpDiscuz
