ශ්‍රී ලංකා ක්‍රිකට් ආයතනයේ ව්‍යවස්ථාව සංශෝධනය කිරීමට අදාළ ඉදිරි පියවර ගැනීම වළක්වාලමින් අභියාචනාධිකරණය අද ක්‍රීඩා අමාත්‍යවරයා වෙත නියෝගයක් නිකුත් කළා.
ශ්‍රී ලංකා ක්‍රිකට් ව්‍යවස්ථාව ක්‍රීඩා අමාත්‍යවරයා විසින් සංශෝධනය කිරීමට ගෙන තිබෙන තීරණය අභියෝගයට ලක් කරමින් ශ්‍රී ලංකා ක්‍රිකට් ආයතනයේ සභාපති ෂම්මි සිල්වා සහ ලේකම් මොහාන් ද සිල්වා විසින් ඉදිරිපත් කළ පෙත්සමක් සලකා බැලීමෙන් අනතුරුවයි මෙම නියෝගය නිකුත් කර ඇත්තේ.
ඒ අනුව පෙත්සම සලකා බලන තෙක් ශ්‍රී ලංකා ක්‍රිකට් ව්‍යවස්ථාව සංශෝධනය කිරීමට අදාළ ඉදිරි පියවර නොගන්නා ලෙසත් අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ චමත් මොරායස් යන මහත්වරු විසින් ක්‍රීඩා අමාත්‍යවරයා වෙත නිකුත් කළ නියෝගයේ සඳහන්.
පෙත්සම්කරුවන් කියා සිටින්නේ ශ්‍රී ලංකා ක්‍රිකට් ව්‍යවස්ථාව සංශෝධනය කළ යුතු ආකාරය වත්මන් ක්‍රිකට් ව්‍යවස්ථාව තුළ සඳහන් කර ඇති බවයි.
එම ව්‍යවස්ථාමය ප්‍රතිපාදන වලින් බැහැරව ක්‍රිකට් ව්‍යවස්ථාව සංශෝධනය කිරීමට ක්‍රීඩා අමාත්‍යවරයා කටයුතු කරන බවට චෝදනා කළ පෙත්සම්කරුවන් එය අනීතික මෙන්ම අත්තනොමතික ක්‍රියාවක් බවත් එම ව්‍යවස්ථාව සංශෝධනය කිරීමට ක්‍රීඩා අමාත්‍යවරයාට බලයක් නොමැති බව කියා සිටියා.
මෙම පෙත්සම අද කැඳවූ අවස්ථාවේ දී පෙත්සම්කරුවන් වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා ඉල්ලා සිටියේ මෙම පැමිණිල්ලට අදාළව කරුණු තහවුරු කිරීමට කඩිනම් දිනයක් ලබා දෙන ලෙසටයි.
ඒ අනුව මෙම පෙත්සමට අදාළ විරෝධතා තිබේනම් ඒවා මේ මස 27 වනදාට පෙර ගොනුකරන ලෙස ක්‍රීඩා අමාත්‍යවරයා ඇතුළු වගඋත්තරකරුවන්ට නියෝග කළ අධිකරණය ඊට අදාළ ප්‍රතිවිරෝධතා තිබේ නම් ඒවා ඔක්තෝබර් මස 12 වනදාට පෙර ගොනුකරන ලෙසත් පෙත්සම්කාර පාර්ශවයට නියම කළා.
ඉන් අනතුරුව අදාළ පෙත්සම සලකා බැලීම සඳහා ඔක්තෝබර් මස 19 වන දා කැඳවන ලෙසත් අධිකරණය විසින් නියෝග කළා.
