“දූෂිත ශ්‍රී ලංකා ක්‍රිකට් ආයතනයෙහි සභාපති ඇතුළු නිලධාරී මණ්ඩලය ඉවත්කිරීම” යන මැයෙන් පාර්ලිමේන්තුවට ගෙන ආ යෝජනාව ඒකමතිකව සම්මත වී තිබෙනවා.
විපක්ෂ නායකවරයා විසිනුයි අද පාර්ලිමේන්තුවට මෙම යෝජනාව ඉදිරිපත් කරනු ලැබුවේ.
අද දිනය පුරා මෙම යෝජනාවට අදාළ විවාදය පැවති අතර අනතුරුව එය ඡන්ද විමසීමකින් තොරව සම්මත කෙරුණා.
කෙරුණා. කතානායකවරයා මෙහිදී පාර්ලිමේන්තුවේ මතය විමසා සිටි අතර සභා නායක අමාත්‍ය ප්‍රසන්න රණතුංග සඳහන් කළේ විපක්ෂය විසින් ගෙන ආ යෝජනාව ආණ්ඩු පක්ෂය විසින් ස්ථිර කර ඇති බැවින් එය සම්මත වන බවයි. අනතුරුව යෝජනාව සම්මත වූ බව කතානායකවරයා පාර්ලිමේන්තුවට නිවේදනය කළා. මෙම අවස්ථාවේ ජනතා විමුක්ති පෙරමුණේ සාමාජිකයන් පාර්ලිමේන්තුවට පැමිණ සිටියේ නැහැ.
නියෝජ්‍ය කථානායක අජිත් රාජපක්ෂ මහතාගේ ප්‍රධානත්වයෙන් ඊයේ (08) පස්වරුවේ පැවති පාර්ලිමේන්තු කටයුතු පිළිබඳ කාරක සභා රැස්වීමේදීයි “දූෂිත ශ්‍රී ලංකා ක්‍රිකට් ආයතනයෙහි සභාපති ඇතුළු නිලධාරී මණ්ඩලය ඉවත්කිරීම” යන මැයෙන් මෙම යෝජනාව ගෙන ඒමට තීරණය කෙරුණේ.
මේ අනුව විවාදයට අදාළ යෝජනාව විපක්ෂ නායකවරයා විසින් ඉදිරිපත් කිරීමටත් ආණ්ඩු පාර්ශ්වය විසින් එය ස්ථීර කිරීමටත් එකගත්වය පළ වී තිබුණා.
