රුහුණු කතරගම මහා දේවාලයට පාතාල නායක අංගොඩ ලොක්කාගේ බිරිඳ විසින් පූජා කළ පවුම් 38ක් බරැති රත්රන් තැටිය අතුරුදන් කිරීමේ සිද්ධියට අදාළව දේවාලයේ ප්රධාන කපුවා සහ දේවාලයේ ගබඩාව භාර කපුවා අත්අඩංගුවට ගැනීමට නීතිපතිවරයා උපදෙස් ලබාදී තිබෙනවා.
දරුවාගේ අපලය දුරුවීමට අංගොඩ ලොක්කාගේ බිරිඳ විසින් මෙම රත්රන් තැටිය දේවාලයට පූජාකර ඇති බවයි වාර්තා වන්නේ.
මෙම රන්තැටිය අතුරුදන් වීම සම්බන්ධව රුහුණු කතරගම දේවායේ බස්නායක නිලමේ ඩිෂාන් වික්රමරත්න ගුණසේකර විසින් 2021 ඔක්තෝබර් මාසයේ දී පොලිස්පතිවරයාට කරන ලද පැමිණිල්ලකින් පසුව විමර්ශන සඳහා ජ්යෙෂ්ඨ නියෝජ්ය පොලිස්පති දේශබන්දු තෙන්නකෝන් විසින් කොළඹ අපරාධ කොට්ඨාසය වෙත භාරදී තිබුණා.
ඒ, අනුව එහිදී කරන ලද විමර්ශනවල දී අංගොඩ ලොක්කා හෙවත් මද්දුමගේ ලසන්ත චන්දන පෙරේරාගේ බිරිඳ වන අබේසිංහගේ නිසංසලා ප්රකාශ මඟින් ලබාදී ඇත්තේ තම පුතාගේ අපලයන් දුරුවන්නට පුතුගේ නම කෙටූ රත්රන් තැටියක් කතරගම දේවාලයට පූජා කළ බවයි.
දරුවාගේ වයසට සරිලන පවුම් පහක් පූජා කිරීමට ගිය ද පසුව දේවාලයේ කපු මහතුන්ගේ උපදෙස් මත අංගොඩ ලොක්කාගේ වයසට සරිලන්නට පවුම් 38ක් බරැති රත්රන් යොදා තැටිය හැදු බව ද ඇය පවසා තිබෙනවා.
කතරගම හෝටලයක අරක්කැමියකු වූ සුජිත් ප්රසන්න නමැත්තාට අංගොඩ ලොක්කා කතාකර රත්රන් තැටිය සාදා දීමට කටයුතු සලසා දෙන්නැයි කී බවත්, ඒ අනුව කඩුවෙලට ගිය පසු අංගොඩ ලොක්කාගේ ගෝලයන් ගෙනවිත් දුන් රත්රං බිස්කට් කතරගම රන් බඩු සාදන අයෙකු විසින් තැටිය සකස් කර දුන් බවයි අනාවරණය වී ඇත්තේ.
ඒ, අනුව 2019 ජූලි 03 වනදා කතරගම දේවාලයට අංගොඩ ලොක්කාගේ බිරිඳ දරුවා රැගෙන ගොස් පූජා කළ බවත් එහි පූජාව කළේ ප්රධාන කපු මහතා වන සොමිපාල ටී. රත්නායක බවත් හෙළිව තිබෙනවා.
කතරගම මහා දේවාලයේ කපු මහතුන් 15 දෙනෙකු සේවය කරන බවත්, සෑම මාසයකම මාසය භාර කපු මහතා ලෙස නම්කරන අය එම මාසයේ පූජා කරන මුදල් හා දේපළ ලබාගෙන ඇති බවත් හෙළි වී තිබෙනවා.
බැතිමතුන් පූජා කරන වටිනා භාණ්ඩ දේවාල මාලිගාවේ ගබඩා කර තැබිය යුතු අතර, එයට ඇතුළු වීමට අවසර ඇත්තේ කපු මහතුන් 15 දෙනාට සහ බස්නායක නිලමේවරයාට පමණයි.
අංගොඩ ලොක්කාගේ බිරිඳ පැමිණ රන් තැටිය පූජා කරන මාසයේ තේවාව භාරව සිට ඇත්තේ ප්රධාන කපු මහතා බවත්, ගබඩාව භාර කපු ධුරන්දර සමන් ප්රියන්ත විසින් එය පූජා කර සති දෙකකට පසු සොමිපාල රත්නායක ප්රධාන කපු මහතාගේ කාමරයට එම රන් තැටිය ගෙනගොස් තැබූ බවත් ප්රකාශ ලබාදී තිබෙනවා.
මෙය අතුරුදන් බව බස්නායක නිලමේවරයාට ලද නිර්ණාමික ඇමතුමකින් පසු කරන ලද පැමිණිල්ලෙන් පසුව කපු මහතුන් ගෙන්වා තොරතුරු විමසා ඇති බවයි වාර්තා වුණේ.
මෙම රත්රං තැටිය පූජාකර දවස් තුනක් එය දේවාලයේ තැබූ පසු අංගොඩ ලොක්කාගේ බිරිඳ එය නැවත රැගෙන ගිය බවට බස්නායක නිලමේට බොරුවක් කියන ලෙසට ප්රධාන කපුමහතා තමාට දැන් වූ බව මෙය පූජා කිරීමට මැදිහත් වූ අරක්කැමියා විමර්ශනවලදී පවසා ඇති බව සඳහන්.
මෙම සිද්ධියෙන් කපු මහතුන්ට අපකීර්තියක් වන නිසා රත්රං බන්දේසියක් නැවත සාදා දේවාලයේ තැන්පත් කිරීමට කටයුතු කළ බව ප්රධාන කපු මහතා ගබඩාව භාර කපු මහතාගේ ප්රකාශවලින් හෙළි වී තිබෙනවා.
ඒ, අනුව පූජා කරන ලද රන්තැටිය ලෙස හඟවා 2021 ඔක්තෝබර් 26 දින නැවත දේවාලයට රන් තැටියක් භාරදී ඇති බවයි අනාවරණය වී ඇත්තේ.
සොමිපාල කපු මහතා හෙවත් සිය මුත්තා බේරාගැනීමට කලින්, රන්තැටිය නිර්මාණය කළ කතරගම මාලන් නමැති අයට රුපියල් ලක්ෂ 41ක් දී නැවත රත්රං තැටියක් සාදාගත් බවත් එය මුලින් සාදා රැගෙන ගොස් මුත්තාගේ උපදෙස් මත දේවාලයට නැවත තැටිය ගෙනවිත් දුන් බවත් සමන් ප්රියන්ත හෙවත් චූටි කපු මහතා විමර්ශනවලදී හෙළිකර තිබෙනවා.
අතුරුදන් කළ තැටියේ අනුරුව නිර්මාණය කර නැවත දේවාලයේ තැන්පත් කර ඇත්තේ පොලිස් විමර්ශන සිදුවන අතර තිර දී බවයි හෙළිව ඇත්තේ.
