සැප්තැම්බර් මස 21 වැනි දින ඔස්ට්‍රෙලියාවේ සිඩ්නි නුවර සිට කොළඹ කටුනායක ජාත්‍යන්තර ගුවන් තොටුපොළ දක්වා පියාසර කරමින් තිබූ ගුවන් යානයක ප්‍රධාන ගුවන් නියමුවා විසින් ගුවන් නිලධාරිනියක් නියමු කුටියෙන් පිටතට දමා අගුළු දැමීමේ සිදුවීමක් සම්බන්ධයෙන් මේ වනවිට (14) පුළුල් විමර්ශන ආරම්භ කර ඇති බව ශ්‍රී ලංකන් ගුවන් සේවය නිවේදනය කරනවා.
නිවේදනයක් නිකුත් කරමින් ශ්‍රී ලංකන් ගුවන් සේවය සඳහන් කරන්නේ; අදාළ සිදුවීමට ලක් ව ඇත්තේ UL607 අංක දරන ගුවන් යානය බවත් එහි ගුවන් නියමුවරයා විමර්ශන අවසන් වන තෙක් සේවයෙන් ඉවත් කර ඇති බවයි.
ශ්‍රී ලංකන් ගුවන් සේවය; ගුවන් නීතිරීති හා රෙගුලාසිවලට අනුකූලව යමින් අදාළ බලධාරීන් සමග පූර්ණ සහයෝගයෙන් කටයුතු කරන අතර, ගුවන් යානාවේ සිදු වූ සිදුවීම පිළිබඳ ව විමර්ශන වාර්තාව ලැබීමෙන් පසුව ඉදිරි නීතිමය තීරණ ගන්නා බව ද වාර්තා වනවා.
මගී ආරක්ෂාව සහතික කිරීම සහ සියලු නියාමන අවශ්‍යතා සමග අනුකූලව කටයුතු කිරීම ශ්‍රී ලංකන් ගුවන් සේවයේ ප්‍රමුඛතාව වන බව ද නිවේදනයේ සඳහන්.
