එක්ස්ප්‍රස් පර්ල් නෞකාව ගිනි ගැනීමේ සිද්ධියෙන් සිය වෘත්තියට ඇති වූ හානිය වෙනුවෙන් වන්දි අයකර දෙන නියෝගයක නිකුත් කරන ලෙස ඉල්ලා ධීවර ප්‍රජාව විසින් ඉදිරිපත් කළ පෙත්සමක් සංශෝධනය කිරීමට කොළඹ වාණිජ මහාධිකරණය අවසර ලබාදුන්නා.
ධීවර ප්‍රජාව වෙනුවෙන් පෙනී සිටි නීතිඥ හිමාලි කුලරත්න විසින් ඉදිරිපත් කළ කරුණු සලකා බැලීමෙන් අනතුරුව අදාළ පැමිණිල්ල සංශෝධනය කිරීමටයි කොළඹ වාණිජ මහාධිකරණ විනිසුරු ප්‍රදීප් හෙට්ටිආරච්චි මහතා අවසර ලබා දී ඇත්තේ.
අදාළ පැමිණිල්ලේ පැමිණිලිකරුවන් ලෙස ධීවරයන් 70 දෙනෙකු පමණ නම් කර තිබෙනවා.
පෙත්සම්කරුවන් කියා සිටින්නේ එක්ස්ප්‍රස් පර්ල් නෞකාව ගිනි ගැනීම හේතුවෙන් විශාල සමුද්‍ර දූෂණයක් මෙන්ම පාරිසරික හානියක් ද සිදු වූ බවයි.
මෙහි ප්‍රතිඵලයක් ලෙස විශේෂයෙන්ම බස්නාහිර පළාතේ වෙසෙන ධීවරයෙක් දැඩි අගතියට පත්වූ බවත් ඔවුන්ට සිය වෘත්තිය කටයුතු සිදු කරීම අපහසු වී ඇති බවත් පැමිණිල්ලේ සඳහන් කර තිබෙනවා.
අදාළ නෞකාව තුළින් පාරිසරික හා සියලු වෘත්තිය ශුද්‍රයන්ට ඇති වූ හානිය ඇමෙරිකානු ඩොලර් බිලියන 6.7 ක් වශයෙන් තක්සේරු කර තිබෙන බව සඳහන්.
ඒ අනුව අදාළ නෞකාව තුළින් සිය වෘත්තියට සිදු වූ හානිය වෙනුවෙන් වන්දි අයකර දෙන ලෙස ඉල්ලමින් ධීවර ප්‍රජාව විසින් මෙම නඩුව කොළඹ වාණිජ මහාධිකරණය හමුවේ ගොනු කර තිබෙනවා.
