බටහිර උගන්ඩාවේ පාසලකට එල්ල වූ ඉස්ලාමීය අන්තවාදී කැරළිකරුවන්ට සම්බන්ධ සන්නද්ධ කණ්ඩායමක ප්රහාරයකින් 40 දෙනෙකු ජීවිතක්ෂයට පත්වී තිබෙනවා.
ද්විතියික පාසලකට එල්ල වී ඇති මෙම ප්රහාරයෙන් තවත් 8 දෙනෙකු බරපතල තුවාල ලබා ඇති බවයි විදෙස් මාධ්ය වාර්තා කළේ.
මියගිය පිරිස අතර පාසල් ළමුන් ද වන බව සඳහන්.
ප්රහාරයෙන් පසු විරුංගා ජාතික වනෝද්යානය දෙසට පළා ගිය ADF නමින් හැඳින්වෙන සන්නද්ධ කණ්ඩායම උගන්ඩාවේ හමුදා සොල්දාදුවන් විසින් ලුහුබඳිමින් සිටින බව පොලිසිය ප්රකාශ කර තිබෙනවා.
සිකුරාදා රාත්රියේ එල්ල වූ මෙම ප්රහාරයේ දී පාසලේ නේවාසිකාගාරයක් ගිනි තබා ඇති අතර ආහාර ගබඩාවක් ද කොල්ලකා ඇතැයි සඳහන්.
ප්රහාරකයින් පළා ගිය විරුංගා ජාතික වනෝද්යානය අප්රිකාවේ පැරණිතම සහ විශාලතම ජාතික වනෝද්යානය වන අතර කඳුකර ගෝරිල්ලන් ඇතුළු දුර්ලභ සත්ව විශේෂවල නිවහන වනවා.
ADF ඇතුළු සන්නද්ධ කණ්ඩායම් උගන්ඩාව සහ රුවන්ඩාව මායිම්ව ඇති එම වනෝද්යානයේ විශාල වපසරිය සැඟවී සිටින ස්ථානයක් ලෙස භාවිතා කරන බව සඳහන්.
කොන්ගෝව සමඟ උගන්ඩා දේශසීමාවේ සිට කිලෝමීටර් දෙකකට වඩා අඩු දුරකින් පිහිටි පාසලට එල්ල වූ ප්රහාරය වසර ගණනාවකට පසුව උගන්ඩාවේ පාසලකට එල්ල වූ පළමු ප්රහාරයයි.
1998 වසරේ ජූනි මාසයේදී, කොන්ගෝ දේශසීමාව අසල කිච්වම්බා කාර්මික ආයතනයට එල්ල වූ සන්නද්ධ ප්රහාරයකින් සිසුන් 80 දෙනෙකු ඔවුන්ගේ නේවාසිකාගාර තුළ පිළිස්සී මිය ගියා. එහිදී තවත් සිසුන් 100කට වැඩි පිරිසක් පැහැරගෙන ගොස් තිබුණා.
ADF කණ්ඩායම 1990 ආසන්න වසරවලදී නැගෙනහිර උගන්ඩාවේ නිර්මාණය කරන ලද අතර මුස්ලිම්වරුන්ට රජය හිංසා කරන බවට චෝදනා කරමින් දිගු කලක් බලයේ සිටි ජනාධිපති යොවේරි මුසවේනිට එරෙහිව කැරළි ගැසීම ආරම්භ කළා.
2001 වසරේ දී උගන්ඩා හමුදාව විසින් එය පරාජය කිරීමෙන් පසුව, එම සංවිධානය කොන්ගෝව ආසන්න උතුරු කිවු පළාත වෙත ගෙන ගියා.
ADF කැරලිකරුවන් පසුගිය දශක දෙකක කාලය තුළ කොන්ගෝව ඇතුළත සිට ක්රියාත්මක වන බවයි විදෙස් මාධ්ය වාර්තා කළේ.
