ගෙවුණු පැය 24ක කාලය තුළ ඊශ්‍රායලය විසින් ගාසා තීරයේ හමාස් සටන්කාමීන් ඉලක්ක කරගනිමින් එල්ල කරන ලද ප්‍රහාරවලින් ළමුන් ඇතුළු 25 දෙනෙකුවත් ජීවිතක්ෂයට පත් ව ඇති බවට අල් ජසීරා පුවත් සේවය වාර්තා කරනවා.
එම ප්‍රහාරවලින් අල්- මාවාසි ප්‍රදේශයේ බේකරියක සේවය කළ පුද්ගලයින් අවම වශයෙන් 05 දෙනෙකුවත්, නුසෙරාට් අවතැන් කඳවුරේ පුද්ගලයින් 10 දෙනෙකුවත්, ගාසා නගරයේ සයිටවුන් සහ ෂෙයික් රඩ්වාන් ඇතුළු ප්‍රදේශවල ළමුන් ඇතුළු පිරිසක් මියගොස් ඇති බවයි වාර්තා වන්නේ.
ඊශ්‍රායලය විසින් අඛණ්ඩ ව මාරාන්තික ප්‍රහාර එල්ල කරමින් සිටින බවයි අල් ජසීරා පුවත් සේවය සිය වාර්තාවේ සඳහන් කරන්නේ.
මීට අමතරව හමාස් සටන්කාමීන් ද ඊශ්‍රායලයේ බටහිර ඉවුරේ ජෙරිකෝවට වයඹ දෙසින් පිහිටි මුවර්රාජාට් හි ප්‍රදේශවලට ද ප්‍රහාර එල්ල කර තිබෙනවා.
ගාසා තීරයට එරෙහිව ඊශ්‍රායලයේ යුද්ධයෙන් අවම වශයෙන් පුද්ගලයන් 41,226 ක් මිය ගොස් 95,413 ක් තුවාල ලබා ඇති බවත් සඳහන්.
