වතුකරයේ තරුණියන් 25 දෙනෙකුට ක්ෂේත්‍ර නිලධාරි තනතුරු ප්‍රදානය කර තිබෙනවා.
වතුකරයේ සහ ග්‍රාමීය ප්‍රදේශවල පදිංචි තරුණියන් 25 දෙනෙකුටයි මෙලෙස වතු ක්ෂේත්‍රයේ ක්ෂේත්‍ර නිලධාරි තනතුරුවල සේවය කිරීම සඳහා පත්වීම් ලිපි ප්‍රදානය කිරීම අද තලවකැලේ වැවිලි සමාගමේ කළමනාකාර අධ්‍යක්ෂ ආචාර්‍ය රොෂාන් රාජදොරේගේ ප්‍රධානත්වයෙන් සිදු කෙරුණේ.
ඒ නානුඔය රදැල්ල වතු පාලකයින්ගේ සමාජ ශාලාවේදීයි.
එම වතු සමාගමට අයත් තේ වතුවල සේවය කළ වතුකරුවන්ගේ සහ අවට ගම්මානවල පදිංචි මෙම පිරිස අධ්‍යාපනය අවසන් කළ තරුණියන් 450 දෙනෙකු සම්මුඛ පරීක්ෂණයට ලක් කර ඉන් තෝරාගත් තරුණියන් 25 දෙනෙකු බවත්; වාර්තා වනවා.
තලවකැලේ තේ පර්යේෂණ ආයතනයේ සහ ඒ වතු සමාගම යටතේ පාලනය වන වතු 16ක තේ වගාව පිළිබඳ මාස 06ක පුහුණු පාඨමාලාවක් පවත්වා ඉන් අනතුරුවයි මෙම ක්ෂේත්‍ර නිලධාරී පත්වීම් ලබා දී ඇත්තේ.
පත්වීම් ලැබූ නව ක්ෂේත්‍ර නිලධාරින් අද දින සිට තලවකැලේ වැවිලි සමාගම යටතේ පාලනය වන වතු 16 පවතින ක්ෂේත්‍ර නිලධාරි තනතුරු සඳහා යොමු කළ බවත්, ඔවුන් එම වතුයායේ කාර්ය මණ්ඩලයේ සාමාජිකයින් වශයෙන් කටයුතු කරන බවත්, එම තනතුරුවලට කාන්තාවන් බඳවාගත් පළමු අවස්ථාව මෙය බවත් වාර්තා වනවා.
මෙම පත්විම් ප්‍රදානයෙන් අනතුරුව මාධ්‍යයට අදහස් දැක්වූ එම වතු සමාගමේ කළමනාකාර අධ්‍යක්ෂ ආචාර්‍ය රොෂාන් රාජදොරේ කියා සිටියේ 2024 අයවැයෙන් වැට් බද්ද 18% කින් වැඩි කිරිම නිසා තේ වතු පවත්වාගෙන යාමට ගැටළු රැසක් මතු වී ඇති බවයි.
වැට් බද්ද වැඩි කිරීම නිසා තේ නිෂ්පාදන වියදම ඉහළ යන බවත්, ඒ තුළින් වතු කම්කරුවන්ට ලැබෙන ආදායමේ ද අඩුවක් විය හැකි බවත් හෙතෙම වැඩිදුරටත් සඳහන් කළා.
