කැස්බෑව පොලිස් වසමේ කැබැල්ලගහ වත්ත පාර ප්‍රදේශයේ දී ඊයේ (09) සිදුකළ මෙහෙයුමක දී විදේශගතව සිටින සංවිධානාත්මක අපරාධකරුවෙකු හා මහා පරිමාණ මත්ද්‍රව්‍ය ජාවාරම්කරුවෙකු වන අහුංගල්ල ලොකු පැටී නැමැත්තාගේ මෙරට මත්ද්‍රව්‍ය ජාලය මෙහෙය වූ පිරිසක් අත්අඩංගුවට ගෙන තිබෙනවා.
විශේෂ කාර්ය බලකාය විසින් සිදුකළ මෙම මෙහෙයුමේ දී අත්අඩංගුවට ගෙන ඇත්තේ වීරවිල, පාදුක්ක හා ගල්කිස්ස යන ප්‍රදේශයන්වල පදිංචි වයස අවුරුදු 24,28,48 පසුවන ලොකු පැටීගේ ප්‍රධානම ගෝලයන් තිදෙනෙක්.
සැකකරුවන් සන්තකයේ තිබී මිලි මීටර් 09 වර්ගයේ පිස්තෝල අවියක්, මයික්‍රෝ වර්ගයේ පිස්තෝල අවියක්, උණ්ඩ රහිත මැගසින් දෙකක්, රුපියල් කෝටි තිහකට ආසන්න වටිනාකමකින් යුතු හෙරොයින් කිලෝ 13ක්, ග්‍රෑම් 106ක්, හෑෂ් මත්ද්‍රව්‍ය ග්‍රෑම් 164ක් සහ මෝටර් රථ 02ක් විශේෂ කාර්ය බලකායේ භාරයට ගෙන තිබෙනවා.
අත්අඩංගුවට ගැනුණු සැකකරුවන් වැඩිදුර විමර්ශන කටයුතු සඳහා පොලිස් මත්ද්‍රව්‍ය නාශක කාර්යාංශය වෙත භාර දී ඇති බවයි වාර්තා වුණේ.
