කල්මුණේ ළමා පරිවාස නිවාසයේ භාරයේ සිටි 14 හැවිරිදි පිරිමි ළමයෙකුට පහර දී ඝාතනය කිරීමේ සිද්ධිය සම්බන්ධයෙන් එහි අධීක්ෂකවරිය අත්අඩංගුවට ගෙන තිබෙනවා.
කල්මුණේ පොලිසිය පවසන්නේ මෙම අධීක්ෂකවරිය ඊයේ (02) දිනයේ දී අත්අඩංගුවට ගත් බවයි.
මඩකලපුව ප්‍රදේශයේ පිහිටි විහාරස්ථානයක ඝණ්ඨාරයක් සොරකම් කිරීමේ සිද්ධියක් සම්බන්ධයෙන් අත්අඩංගුවට ගෙන අධිකරණය වෙත ඉදිරිපත් කිරීමෙන් පසු අදාළ 14 හැවිරිදි පිරිමි ළමයා පරිවාස භාරයට පත්කළ බවයි වාර්තා වුණේ.
මෙම දරුවා පරිවාස මධ්‍යස්ථානය තුළ දිගින් දිගටම අශෝභන ලෙස හැසිරීමෙන් කෝපයට පත් එහි අධීක්ෂකවරිය පිරිමි ළමයාට අමානුෂික ලෙස පහර දී කූඩුවක සි කර ඇති බවයි හෙළි වී ඇත්තේ.
පසුව එම ළමයා එම කූඩුව තුළ දීම පසුගිය 30 වනදා මියගොස් ඇති බව පොලිසියේ මූලික විමර්ශනවලදී අනාවරණය වී තිබෙනවා.
මේ සම්බන්ධයෙන් අධිකරණ වෛද්‍ය පොලිස් ඒකකය කැඳවා පරීක්ෂණ පවත්වා ඇති අතර විනිසුරුවරයා එම ස්ථානයට ගොස් මෘත ශරීරය පශ්චාත් මරණ පරීක්ෂණයට ලක් කරන ලෙස නියෝග කරනු ලැබුවා.
ඒ, අනුව මෘත ශරීරය කල්මුණේ අශ්‍රබ් අනුස්මරණ රෝහලට භාර දී පශ්චාත් මරණ පරීක්ෂණය සිදුකර ඇති අතර එහිදී මෙම පිරිමි ළමයා තුවාල ලබා මියගොස් ඇත්තේ පහරදීම නිසා බව අනාවරණය වී තිබෙනවා.
මියගිය ළමයාගේ මෘත දේහය දෙමාපියන් වෙත මේ වනවිටත් භාර දී ඇති අතර, කල්මුණේ මූලස්ථාන පොලිසිය මේ සම්බන්ධයෙන් වැඩිදුර විමර්ශන සිදුකරනු ලබනවා.
