අලි මිනිස් ගැටුම වැළැක්වීමේ අරමුණින් අලි අගල් කැපීමේ ව්‍යාපෘතියක් ක්‍රියාත්මක කිරීමට වනජීවී බලධාරීන් ගෙන තිබෙන තීරණය ක්‍රියාත්මක කිරීම වළක්වමින් නිකුත් කර තිබෙන තහනම් නියෝගය මාර්තු මස 6 වනදා දක්වා දීර්ඝ කිරීමට ශ්‍රේෂ්ඨාධිකරණය නියෝග කර තිබෙනවා.
එම වැඩපිළිවෙලට එරෙහිව පරිසර යුක්ති කේන්ද්‍රය විසින් ඉදිරිපත් කළ මූලික අයිතිවාසිකම් පෙත්සමක් අද යළි කැඳවනු ලැබූ අවස්ථාවේදීයි මෙම නියෝගය නිකුත් කෙරුණේ.
ප්‍රීති පද්මන් සූරසේන, යසන්ත කෝදාගොඩ සහ ප්‍රියන්ත ප්‍රනාන්දු යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ පෙත්සම කැඳවනු ලැබුවා.
එහිදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජනරාල් පාරින්ද රණසිංහ මහතා අධිකරණයට දන්වා සිටියේ එම පැමිණිල්ලට අදාළව කරුණු අධ්‍යනය කරමින් සිටින බවත් ඒ පිළිබඳව කරුණු දැක්වීම සඳහා දිනයක් ලබාදෙන ලෙසයි.
ඒ අනුව අදාළ පෙත්සම 2024 මාර්තු මස 06 වනදා යළි කැඳවීමට නියම කළ ශ්‍රේෂ්ඨාධිකරණය එදින මෙම කටයුතුවල ප්‍රගතිය පිළිබඳව දැනුම් දෙන ලෙසටයි වගඋත්තරකරුවන්ට නියෝග කළේ.
පෙත්සම්කාර පරිසර යුක්ති කේන්ද්‍රය අධිකරණය හමුවේ කියා සිටින්නේ අලි මිනිස් ගැටුම වැළැක්වීමේ අරමුණින් ක්‍රියාත්මක වීමට යෝජනා කර තිබෙන අලි අගල් කැපීමේ ව්‍යාපෘතිය ක්‍රියාත්මක වුවහොත් විශාල පාරිසරික හානියක් සිදුවන බවයි.
එබැවින් එම ව්‍යාපෘතිය ක්‍රියාත්මක කිරීම වැළැක්වීමේ නියෝගයක් නිකුත් කරන ලෙසත් පෙත්සම්කාර සංවිධානය ශ්‍රේෂ්ඨාධිකරණයෙන් ඉල්ලා තිබෙනවා.
wpDiscuz
