අල්ලස් චෝදනා මත අත්අඩංගුවට ගත් මධ්‍යම පරිසර අධිකාරියේ සභාපති සුපුන් ශෂේන්ද්‍ර පතිරගේ ඇතුලු සැකකරුවන් ලබන 13 වනදා දක්වා රක්ෂිත බන්ධනාගාර ගතකර තිබෙනවා.
කොළඹ කොටුව මහේස්ත්‍රාත් අධිකරණයයි නියෝගය ලබාදී ඇත්තේ.
අල්ලස් කොමිසම විසිනුයි සැකකරුවන් අත්අඩංගුවට ගෙන අධිකරණයට ඉදිරිපත් කර තිබුණේ. ව්‍යාපෘතියක් සඳහා රුපියල් කෝටියක අල්ලස් මුදලක් ලබා ගැනීම ඔවුන්ට එරෙහි චෝදනාවයි.
සැකකරුවන් අල්ලස් කොමිසමේ නිලධාරීන් විසින් අත්අඩංගුවට ගෙන තිබුණේ ඊයේ (10) සිදු කළ විශේෂ වැටලීමක දීයි.
වාර්ෂිකව සිය බලපත්‍රය අලුත් කර ගැනීමට අවශ්‍ය වූ දැවිතෙල් ව්‍යාපාරිකයෙකුට මධ්‍යම පරිසර අධිකාරියේ අනුමැතිය ලබා දීම සඳහා රුපියල් කෝටියක අල්ලස් මුදලක් ලබාගැනීමට යෑමේ දී ඔවුන් අත්අඩංගුවට පත්ව ඇති බව සඳහන්.
එහිදී අදාළ අල්ලස් මුදල තැරැව්කරුවන් දෙදෙනෙකුගේ මාර්ගයෙන් ලබා ගැනීමට සැළසුම් කර තිබී ඇති බව ද වාර්තා වී තිබෙනවා.
මධ්‍යම පරිසර අධිකාරියේ සභාපති සුපුන් එස්. පතිරගේ ඔහුගේ කාර්යාලයේදීත් අනෙක් දෙදෙනා සුපිරි වෙළෙඳසලක් තුළදීත් අත්අඩංගුවට ගෙන තිබුණා.
අත් අඩංගුවට ගත් සැකකරුවන් අතර සබරගමු පළාත් සභාවේ හිටපු මන්ත්‍රීවරයකු ද සිටින බව සඳහන්.
