පාස්කු ප්රහාරය සම්බන්ධයෙන් සිදුකරන විමර්ශනවල දී පුද්ගලයන්ගෙන් අනාවරණය කරගත් තොරතුරු අනුව අත්අඩංගුවට ගත් අල්කයිඩා, අයි.එස් ත්රස්ත පුහුණුව ලැබූ සැකකාර පුද්ගලයෙක් නීතිපති උපදෙස් ලැබෙන තෙක් රක්ෂිත බන්ධනාගාරගත කරන ලෙස කොළඹ අතිරේක මහේස්ත්රාත් පසන් අමරසේන මහතා නියෝග කළා.
සිරියාව ඇතුළු විදෙස් රටවල් කිහිපයක ක්රියාත්මක අල්කයිඩා හා අයි.එස් වැනි ත්රස්ත සංවිධානවලට සම්බන්ධව පුහුණුව ලබා මෙරටට පැමිණ ඇති බව කියන පාදුක්ක ප්රදේශයේ පදිංචි මොහොමඩ් නිලාබ්දීන් මොහොමඩ් රිස්වාන් නැමැත්තෙකු මෙලෙස රක්ෂිත බන්ධනාගාර ගත කෙරුණා.
අත්අඩංගුවට ගත් සැකකාර පුද්ගලයා අධිකරණ නියෝග මත ත්රස්ත මර්දන විමර්ශන කොට්ඨාසය හමුවේ රඳවා තබාගෙන ප්රශ්න කර අධිකරණයට ඉදිරිපත් කිරීමෙන් අනතුරුව මෙලෙස රක්ෂිත බන්ධනාගාරගත කිරීමට නියම වුණා.
අන්තවාදී ත්රස්තවාදී ක්රියාකාරකම්වලට අනුබලදීමේ චෝදනාව යටතේ සැකකාර පුද්ගලයා අත්අඩංගුවට ගත් බව ද සැකකාර පුද්ගලයා අධිකරණය වෙත ඉදිරිපත් කළ ත්රස්ත මර්දන විමර්ශන කොට්ඨාසය අධිකරණයට දැනුම් දුන්නා.
පාස්කු ප්රහාරයට සම්බන්ධ සැකකරුවන් අත්අඩංගුවට ගැනීම සඳහා විමර්ශන සිදුකරන බවත් ඒ අනුව එම පුද්ගලයාන්ගෙන් අනාවරණය කරගත් තොරතුරු අනුව සැකකාර පුද්ගලයා පිළිබඳව තොරතුරු හෙළිකරගෙන අත්අඩංගුවට ගත් බව ද ත්රස්ත මර්දන විමර්ශන කොට්ඨාශය සිද්ධිය සම්බන්ධයෙන් කරුණු දක්වමින් අධිකරණය හමුවේ පැවසුවා.
සැකකාර පුද්ගලයා සිද්ධිය සම්බන්ධයෙන් අධිකරණය හමුවේ රහස් ප්රකාශයක් ද ලබාදුන්නා.
