අන්තර් පළාත් අර්ධ සුඛෝපභෝගී බස් රථ සඳහා නිකුත් කර තිබූ බලපත්‍ර 430ක් අහෝසි කිරීම වළක්වමින් අභියාචනාධිකරණය අතුරු තහනම් නියෝගයක් නිකුත් කළා.
අන්තර් පළාත් පුද්ගලික බස් රථ සංගමය සහ එහි සාමාජිකයින් 28 දෙනෙකු විසින් ඉදිරිපත් කළ රිට් පෙත්සමක අතුරු නියෝගයක් නිකුත් කරමිනුයි අභියාචනාධිකරණය එම නියෝගය නිකුත් කළේ.
ඒ අනුව අදාළ පෙත්සම් පිළිබඳ විභාගය අගෝස්තු මස 28 වන දා පවත්වන බවත් අධිකරණය දැනුම් දී තිබෙනවා.
එදින අධිකරණය හමුවේ කරුණු දක්වන ලෙස දන්වා ජාතික ප්‍රවාහන කොමිසම, එහි සභාපතිවරයා, අමාත්‍ය මණ්ඩලයේ සාමාජිකයින් ඇතුළු වගඋත්තරකරුවන් 33 දෙනෙකු වෙත අධිකරණය විසින් නොතීසි නිකුත් කරනු ලැබුවා.
අභියාචනාධිකරණයේ සභාපති විනිසුරු නිශ්ශංක බන්දුල කරුණාරත්න සහ ඒ. මරික්කාර් යන මහත්වරුන්ගෙන් සමන්විත විනිසුරු මඩුල්ල විසිනුයි අද මෙම නියෝගය ලබාදුන්නේ.
තීන්දුව ප්‍රකාශයට පත් කිරීමෙන් පසුව අභියාචනාධිකරණ සභාපති විනිසුරුවරයා පෙත්සම්කාර පාර්ශවයට දැනුම් දුන්නේ මෙම ගැටළුව අමාත්‍යවරයා සමග සාකච්ඡා කර විසඳුමක් සෙවීමට උත්සාහ කරන ලෙසයි.
පෙත්සම්කරුවන් කියා සිටින්නේ අද දින සිට අන්තර් පළාත් අර්ධ සුඛෝපභෝගී බස් රථ සේවාව සඳහා නිකුත් කර තිබූ බලපත්‍ර අත්හිටුවිමට ජාතික ප්‍රවාහන කොමිසම තීරණය කර ඇති බවයි.
අමාත්‍ය මණ්ඩලය විසින් ගනු ලැබූ තීරණයකට අනුව එය ක්‍රියාත්මක වන බවත් පෙත්සමේ සඳහන්.
බස් හිමියන්ගේ අදහස් විමසීමකින් තොරව මේ ආකාරයෙන් සිය බස් සේවාව අහෝසි කිරීමට ගත් තීරණය බලරහිත කරන ලෙස ඉල්ලා වෙසක් කරුවන් විසින් මේ පෙත්සම ඉදිරිපත් කර තිබුණා.
