අමෙරිකා එක්සත් ජනපදය විසින් තීරුබදු සියයට 44ක ප්‍රමාණයක් ශ්‍රී ලංකාවට පමුණුවාලීම මෙරට ආර්ථිකයට සෘජු ලෙස බලපෑම් එල්ල කරන බව ශ්‍රී ජයවර්ධනපුර විශ්වවිද්‍යාලයේ ආර්ථික විද්‍යා අධ්‍යයන අංශයේ අංශාධිපති මහාචාර්ය ගාමිණී වීරසිංහ මහතා පවසනවා.
විශේෂ මාධ්‍ය සාකච්ඡාවකට එක්වෙමින් මහාචාර්‍යයවරයා පැවසුවේ ශ්‍රී ලංකාවේ පැවති දරුණු ආර්ථික අර්බුදයෙන් පසුව ආර්ථිකය වර්ධනය කරගනිමින් සිටින මොහොතක මෙම පීඩනය දරාගැනීම අපහසු බවයි.
ශ්‍රී ලංකාවේ ආර්ථිකය වර්ධනය කිරීමට නම් ලෝක වෙළෙඳපොළ තුළ අපනයන වෙළෙඳපොළ පුළුල් කරගැනීම වැදගත් වනවා.
මෙරට අපනයනයට වැඩි දායකත්වයක් ලබාදෙන ඇඟලුම් ක්ෂේත්‍රයට අමෙරිකාව විසින් පනවන ලද තීරුබදු වැඩි කිරීම දැඩි ලෙස අහිතකර තත්ත්වයක් ඇති කරන බවත්, මෙරට අපනයනවලින් සියයට 45ක් පමණ ඇඟලුම් භාණ්ඩ සිදු වන බවත් අමෙරිකාවේ ක්‍රියාකලාපය හරහා භාණ්ඩ මිල ඉහළ යන බවයි මහාචාර්‍යවරයා පැවසුවේ.
වැඩි බද්දක් ගෙවීම හේතුවෙන් භාණ්ඩ මිල ඉහළ යාමත්, නිෂ්පාදන මිලදී ගැනීම අඩු වී, දේශීය ඇඟලුම් කර්මාන්තය අසීරු අඩියකට ලක් වන බව ද වාර්තා වනවා.
මෙය වළක්වා ගැනීමට නම් වෙනත් අපනයන වෙළෙඳපොළක් සොයාගත යුතු අතර එය කෙටි කාලයකින් සිදු කිරීමට නොහැකි බව ද ඩොලර් සංචිතවලට සේ ම විනිමය අනුපාතවලට ද බලපෑම් එල්ල කරන බවත් මහාචාර්ය ගාමිණී වීරසිංහ මහතා සඳහන් කළා.
