ඉහළ ජල පෝෂිත කලාපයට ඇද හැලෙන අධික වර්ෂාවත් සමග කලාවැව වාන් මට්ටමට පැමිණ ඇති බවට වාර්තා වනවා.
මේ වන විට (27) අක්කර අඩි 85,500 ක ජල ධාරිතාවක් දක්වා ජල මට්ටම පැමිණ ඇති බවයි වාර්තා වන්නේ.
ඒ හේතුවෙන් කලාවැව හදිසි වාන් දොරටු දෙක අඩි 10ක් දක්වා විවෘත කිරීමටයි කලාවැව භාර වාරි ඉංජිනේරුවරයා කටයුතු කර තිබෙන්නේ.
එමගින් තත්ත්පරයට ඝන අඩි 10,420ක ජල ධාරිතාවක් කලාඔයට නිකුත් වනවා.
එමෙන්ම දිවයින පුරා ඇදහැලෙන ධාරාණිපාත වර්ෂාව හේතුවෙන් සියඹලාණ්ඩුව හැඩඔය පිටාර ගැලීම ආරම්භ වී තිබෙනවා.
අයහපත් කාලගුණය නිසා උතුරේ පුද්ගලයින් 53,000ක් පීඩාව ලක් ව ඇති බවයි වාර්තා වන්නේ.
එහි වැඩිම බලපෑම මන්නාරම සිදු ව තිබෙනවා.
ධාරාණිපාත වර්ෂාව හේතුවෙන් සහ ඇති වූ ගංවතුර තත්ත්වයන් හේතුවෙන් උතුරු පළාතේ පවුල් 15,128කට අයත් පුද්ගලයින් 53,152 දෙනෙකු පීඩාවන්ට පත්ව ඇති බවට ආපදා කළමනාකරණ ඒකකය පවසනවා.
උතුරු පළාතේ වැඩිම බලපෑම එල්ල වී ඇත්තේ මන්නාරම් දිස්ත්‍රික්කයට වන අතර එහි පවුල් 12,485කට
අයත් පුද්ගලයින් 43,679 දෙනෙකු පීඩාවට පත්ව සිටිනවා.
යාපනය දිස්ත්‍රික්කයේ ද පවුල් 2040කට අයත් පුද්ගලයින් 7436 දෙනෙකු පීඩාවට පත්ව ඇති අතර, කිලිනොච්චිය දිස්ත්‍රික්කයේ පවුල් 497කට අයත් පුද්ගලයින් 1691 දෙනෙකු සහ මුලතිව් පවුල් 106කට අයත්
පුද්ගලයින් 346 දෙනෙකු පීඩවන්ට පත්ව සිටින බවයි දසත ප්‍රාදේශීය වාර්තාකරු පැවසුවේ.
මේ අතර මධ්‍යම කඳුකරයට තවදුරටත් කඩින් කඩ තද වැසි ඇති වන බවත් වාර්තා වනවා.
මේ හේතුවෙන් විමලසුරේන්ද්‍ර ජලාශය ද වාන් දමමින් සිටින බවයි පැවසෙන්නේ.
මධ්‍යම කඳුකරයේ බටහිර බෑවුම් ප්‍රදේශවලට තවදුරටත් ඇද හැලෙන අධික වර්ෂාවත් සමග නෝටන්බ්‍රිජ් විමලසුරෙන්ද්‍ර ජලාශය අද (27) අලුයම සිට වාන් දැමීම ආරම්භ වුණා.
කාසල්රි සහ මවුස්සාකැලේ ජලාශවල ජල මට්ටම ද ඉහළ යමින් පවතින බවයි වාර්තා වන්නේ.
පවතින අයහපත් කාලගුණයත් සමග නෝටන්බ්‍රිජ් ප්‍රදේශය පුරා ගන මීදුම් තත්ත්වයක් ද හටගෙන තිබෙනවා.
එබැවින් පොලිසිය ඉල්ලා සිටින්නේ රියදුරන් සිය රථවාහනවල ඉදිරිපස ලාම්පු දල්වා ගමන් කිරීම වැදගත් බවයි.
මේ අතර ඊයේ රාත්‍රියේ දී අම්පාර – කාර්තිව් මාවඩිපල්ලි ප්‍රදේශයේ දී සිසුන් පිරිසක් රැගත් ට්‍රැක්ටරයක් පෙරළීමෙන් අතුරුදන් වූ සිසුන් 06 දෙනාගේ සිරුරු මෙතෙක් හමු වී නැහැ.
නාවික හමුදාවේ දායකත්වයෙන් එම මෙහෙයුම් දිගින් දිගටම සිදු වන බවත් වාර්තා වනවා.
කෙසේවෙතත් අවතැන් වූවන් සඳහා අවශ්‍ය සියලුම පහසුකම් සලසමින් සිටින බවයි පැවසෙන්නේ.
