ශ්‍රී ලංකාවේ මේ වන විට පවතින ඉන්ධන ගැටලුව අප්‍රේල් 20 වෙනිදායින් පසුව ත්‍රිව වනු ඇති බවට අනාවැකි පළවනවා. එයට මුලික හේතුව වී ඇත්තේ මේ වන විට ශ්‍රී ලංකාව මුහුණ දී සිටින විදේශ විනිමය ගැටළුවයි.
දැනට ශ්‍රී ලංකාවට අවශ්‍ය ඉන්ධන වලින් ඩිසල් ඇතුළු ඉන්ධන සපයා ගනු ලබන්නේ අසල්වැසි ඉන්දියාවෙන් ලබා ගන්නා ණය පහසුකමක් යටතේයි. ඉන්දියාව විසින් ශ්‍රී ලංකාවට ඩොලර් මිලියන 500ක ණය පහසුකමක් සපයනු ලැබුවේ ඉකුත් මාසයේදීයි.
මේ වන විට එම ණය පහසුකමෙන් ශ්‍රී ලංකාව සීයයට 60ක ප්‍රමාණයක් භාවිතයට ගෙන අවසන් බවයි වාර්තා වන්නේ. මේ හේතුවෙන් ශ්‍රී ලංකාවට එළඹෙන අප්‍රේල් 20 වෙනිදායින් පසුව ඉන්ධන සපයා ගැනීමේ දී විදේශ විනිමය සොයා ගැනීම අත්‍යවශ්‍ය සාධකයක් බවට පත්ව තිබෙනවා.
මේ දක්වා ඉන්දීය ණය පහසුකම් යටතේ ලබා ගනු ලැබූ ඩිසල් තොග වලින් වැඩි ප්‍රමාණයක් ප්‍රයෝජනයට ගෙන ඇත්තේ මෙරට විදුලි ඉල්ලුම සැපයීම සඳහා වන තාප බලාගාර ක්‍රියාත්මක කිරීමටයි.
මේ අතර අද දිනයේදී ද ඉන්ධන නොමැතිකම නිසා දිවයිනේ බොහෝ පළාත්වල ඉන්ධන පිරවුම්හල් අසල වාහන පෝලිම් දක්නට ලැබූ බව අප වාර්තාකරුවන් සඳහන් කර සිටියා.
