අන්තවාදී ත්රස්තවාදින් පිරිසක් මෙරට ඇමෙරිකානු තානාපති කාර්යාලයට හා එහි නිලධාරීන්ට ප්රහාරයක් එල්ල කරන බවට මාධ්ය ජාලා ඔස්සේ ප්රචාරය කළ බව කියන සැකකාර පුද්ගලයකු මෙම මස 28 දින දක්වා රක්ෂිත බන්ධනාගාර ගත කරන ලෙස කොළඹ අතිරේක මහේස්ත්රාත් පසන් අමරසේන මහතා අද (24) නියෝග කළා.
ත්රස්ත මර්දන විමර්ශන කොට්ඨාසය මගින් අත්අඩංගුවට ගෙන අධිකරණයට ඉදිරිපත් කළ බත්තරමුල්ලේ අමාර් ශාබිර් හුසේන් අම්බාස් නමැති සැකකරු මෙසේ රක්ෂිත බන්ධනගාරගත කෙරුණු බවයි වාර්තා වන්නේ.
මේ වන විට සිදු කරමින් පවතින විමර්ශනවලට අනුව සැකකාරා පුද්ගලයා අසත්යය ප්රචාරයක් සමාජ මාධ්ය ජාලා ඔස්සේ ප්රචාරය කර තිබෙන බවට කරුණු අනාවරණය වී තිබෙන බවත් කෙසේ වුව ද සිද්ධිය සම්බන්ධයෙන් තවදුරටත් විමර්ශනය කරමින් පවතින බව ද විමර්ශන නිලධාරීහු අධිකරණය හමුවේ දැනුම්දුන්නා.
සැකකාර පුද්ගලයාට යම් මානසික ආබාධයක් තිබේ ද යන්න පිළිබඳ ව සොයා බැලීම සඳහා මානසික වෛද්ය වාර්තාවක් කැඳවීමට අවසර ලබා දෙන ලෙස ටද විමර්ශන නිලධාරීන් අධිකරණයෙන් ඉල්ලා සිටියා.
සිද්ධිය සම්බන්ධ විමර්ශන කටයුතු තවදුරටත් අවසන්ව නොමැති බැවින් සැකකාර පුද්ගලයා රක්ෂිත බන්ධනාගාර ගත කිරීමට නියෝගයක් ලබා දෙන ලෙසට විමර්ශන නිලධාරීන් කළ ඉල්ලීම සලකා බැලූ මහේත්රාත්වරයා ඔහු එසේ රක්ෂිත බන්ධනාගාරගත කරන ලෙසට නියෝග කළා.
සැකකාර පුද්ගලයා සම්බන්ධ මානසික වෛද්ය වාර්තාවක් කැඳවීමට ද අවසර ලබා දුන් මහේස්ත්රාත්වරයා එම සිද්ධියට අදාළ ප්රගති වාර්තාවක් කඩිනමින් අධිකරණය වෙත ඉදිරිපත් කරන ලෙස ද විමර්ශන නිලධාරීන්ට වැඩිදුරටත් නියෝග කළා.
