අන්තර්ජාලය ඔස්සේ මූල්‍ය වංචා සිදු කිරීම සඳහා පවත්වාගෙන ගිය බව කියන කොළඹ හැව්ලොක් ප්‍රදේශයේ නිවාස සංකීර්ණයක පිහිටි “වේව් ටෙක්” නමැති සමාගම් කාර්යාලය තුළ තිබෙන පරිගණක ඇතුළු සෙසු භාණ්ඩ සැකකාර පාර්ශ්වයට ලබාදිය හැකියාව තිබේ ද නැද්ද යන්න පිළිබඳ ව විමර්ශනයක් සිදුකර අධිකරණයට කරුණු වාර්තා කරන ලෙස කොළඹ අතිරේක මහේස්ත්‍රාත් හර්ෂණ කැකුණවෙල මහතා අපරාධ පරීක්ෂණ දෙපාර්තමේන්තුවට ඊයේ (12) නියෝග කළා.
එම නිවාස සංකීර්ණය තුළ තිබෙන “වේව් ටෙක්” නමැති ආයතනයට අයත් පරිගණක ඇතුළු සෙසු උපාංග තම සේවාදායකයන්ට ලබාදීම සඳහා නියෝගයක් ලබාදෙන ලෙසට සැකකරුවන් වෙනුවෙන් පෙනී සිටි නීතිඥවරුන් මෝසමක් ඉදිරිපත් කරමින් අධිකරණයෙන් ඉල්ලීමක් කළ අතර අපරාධ පරීක්ෂණ දෙපාර්තමේන්තුව ඊට එරෙහි වීම සැලකිල්ලට ගනිමින් මහේස්ත්‍රාත්වරයා එම නියෝගය නිකුත් කරනු ලැබුවා.
මෙහිදී අපරාධ පරීක්ෂණ දෙපාර්තමේන්තුව අධිකරණය හමුවේ කියා සිටියේ කොරියානු ජාතිකයකු සතු රුපියල් කෝටි තිහකට අධික මුදලක් අන්තර්ජාලය ඔස්සේ වංචා කිරීමේ සිද්ධියට අදාළව අධිකරණ නියෝග මත එම ආයතනයට මුද්‍රා තබා ඇති බවත් මේ වන විට එම කාර්යාලය පිහිටි නිවස තුළ පරිගණක 56 ක් ඇතුළු නඩුවට අදාළ ලියකියවිලි රැසක් තිබෙන බවයි.
එහි තිබෙන පරිගණක ඇතුළු අදාළ ලියකියවිලි සම්බන්ධයෙන් තවදුරටත් විමර්ශන සිදු කරගෙන යන බැවින් සැකකරුවන් වෙනුවෙන් පෙනී සිටින නීතිඥවරුන්ගේ ඉල්ලීම ප්‍රතික්ෂේප කරන ලෙස ද අපරාධ පරීක්ෂණ දෙපාර්තමේන්තුව අධිකරණයෙන් ඉල්ලීමක් කළා.
එම ඉල්ලීම සලකා බැලූ අතිරේක මහේස්ත්‍රාත්වරයා එම භාණ්ඩ සැකකරුවන්ට ලබාදිය හැකි ද නැද්ද යන්න පිළිබඳව විමර්ශනයක් සිදුකර අධිකරණයට කරුණු වාර්තා කරන ලෙසට එසේ නියෝග කෙරුණා.
මෙම සිද්ධියට අදාළව එම පෞද්ගලික සමාගමේ අධ්‍යක්ෂකවරුන් වශයෙන් කටයුතු කළ නීතිඥවරියක් ඇතුළු දෙදෙනෙකු අත්අඩංගුවට ගැනීමෙන් අනතුරුව මේ වන විට ඔවුන් ඇප මත මුදා හැර තිබෙනවා.
මෙරට කොරියානු තානාපති කාර්යාලය අපරාධ පරීක්ෂණ දෙපාර්තමේන්තුව වෙත කරන ලද පැමිණිල්ලක් අනුව මෙම නඩුව විභාගයට ගෙන ඇති බවයි දසත අධිකරණ වාර්තාකරු පැවසුවේ.
මෙම සිද්ධියට අදාළව අපරාධ පරීක්ෂණ දෙපාර්තමේන්තුව සැකකරුවන් 53 දෙනෙකු මීට පෙර අත්අඩංගුවට ගෙන තිබූ අතර එම පිරිස ද මේ වන විට ඇප මත මුදාහැර තිබෙනවා.
