දිවයිනට බලපා ඇති වර්ෂාධික කාලගුණ තත්ත්වය හේතුවෙන් දිවයිනේ ප්‍රධාන වැව් 73න් 23ක් මේ වනවිට වාන් දමමින් පවතින බව වාරිමාර්ග දෙපාර්තමේන්තුව දැනුම් දෙනවා.
මෙම තත්ත්වයත් සමඟ දිවයිනේ ප්‍රධාන වැව් හැත්තෑ තුනේ සමස්ත ජල ධාරිතාව 65%ක් දක්වා ඉහළ ගොස් ඇති බවයි එම දෙපාර්තමේන්තුවේ ඉංජිනේරු ලහිරුණී ජයතිලක පවසන්නේ.
මේ අතර මධ්‍යම ප්‍රමාණයේ වැව් රාශියක් ද මේ වනවිට වාන් දමමින් පවතින බවයි එම දෙපාර්තමේන්තුව වැඩිදුරටත් සඳහන් කළේ.
අධික වර්ෂාපතනයත් සමඟ අම්පාර, බදුල්ල , මඩකලපුව සහ අනුරාධපුර යන දිස්ත්‍රික්කවල පිහිටි වැව් සහ ජලාශවල ජල මට්ටම 50%කින් ඉහළ ගොස් ඇති අතර, හම්බන්තොට, මහනුවර, ගාල්ල, කුරුණෑගල සහ මොනරාගල දිස්ත්‍රික්කවල පිහිටි වැව් සහ ජලාශවල ජල ධාරිතාව 80%ක වැඩි ප්‍රමාණයක් ඉහළ ගොස් ඇති බවයි වාර්තා වන්නේ.
ඊට අමතරව පොළොන්නරුව සහ පුත්තලම දිස්ත්‍රික්කවල පිහිටි වැව් සහ ජලාශවල ජල ධාරිතාව 70%කට ආසන්න අගයකින් ඉහළ ගොස් ඇති බවයි වාරිමාර්ග දෙපාර්තමේන්තුව සඳහන් කළේ.
එමෙන්ම ත්‍රිකුණාමලය, මන්නාරම දිස්ත්‍රික්කවල පිහිටි වැව් සහ ජලාශවල ජල ධාරිතාව 45% කට ආසන්න අගයකින් ඉහළ ගොස් ඇති බව සඳහන්.
