පාසල් සිසුන්, ගුරුවරුන් සහ විශ්වවිද්‍යාල සිසුන්ගේ ආරක්ෂිත හා පහසු ගමනාගමනය තහවුරු කිරීමේ අරමුණින් උතුරු පළාත තුළ ‘සිසු සැරිය’ බස් රථ සේවාව ආරම්භ කිරීමේ සමාරම්භක වැඩසටහන අද (15) සිදු කෙරුණා.
වවුනියාව මගී ප්‍රවාහන පර්යන්තයේ දී සමූපකාර සංවර්ධන නියෝජ්‍ය අමාත්‍ය උපාලි සමරසිංහගේ ප්‍රධානත්වයෙන් මෙම වැඩසටහන ආරම්භ කරනු ලැබුවා.
2005 වසරේදී ආරම්භ කරන ලද ‘සිසු සැරිය’ වැඩසටහන යටතේ මෙතෙක් උතුරු පළාතේ වවුනියාව, මන්නාරම, මුලතිව් සහ කිලිනොච්චිය දිස්ත්‍රික්කවල සිසුන්ට මෙම සේවාව හිමිව නොතිබූ අතර, අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍යාංශය හා ප්‍රවාහන අමාත්‍යාංශය එක්ව පළමු අදියර යටතේ උතුරු පළාත සඳහා බස් රථ 20ක් යෙදවීමට පියවර ගෙන තිබෙනවා.
එහි සමාරම්භය සනිටුහන් කරමින් වවුනියාව දිස්ත්‍රික්කයේ පාසල් දරුදැරියන්, ගුරුවරුන් සහ විශ්වවිද්‍යාල සිසුන්ගේ භාවිතය සඳහා ‘සිසු සැරිය’ බස් රථ දෙකක් මෙහිදී නිල වශයෙන් සේවයට එක් කෙරුණා.
මෙම අවස්ථාව අමතමින් නියෝජ්‍ය අමාත්‍යවරයා සඳහන් කළේ, දිවයින පුරා සිසු ප්‍රවාහනය සඳහා බස් රථ 200කට අධික සංඛ්‍යාවක් අලුතින් එක් කිරීමේ වැඩසටහන මේ වන විට ක්‍රියාත්මක වන බවයි.
