සෞදි අරාබියේදී මරණ දඬුවම නියම වී සිටි අනෝජන් සිවරාසා මහතා සියලු චෝදනාවලින් නිදහස් කර ගැනීම සඳහා මැදිහත් වීම පිළිබඳව ඔහුගේ පවුලේ සාමාජිකයින් අද (12) පෙරවරුවේ ජනාධිපති කාර්යාලයේ දී ජනාධිපති අනුර කුමාර දිසානායක හමුවී සිය ස්තූතිය පළ කළා.
එහිදී ඔවුන් සමඟ සුහද පිළිසඳරක නිරත වූ ජනාධිපතිවරයා, ශ්‍රී ලාංකික ජනතාව වෙනුවෙන් ඕනෑම අවස්ථාවක පෙනී සිටීම තම වගකීම බව ප්‍රකාශ කළේ.
අනෝජන් සිවරාසා නිදහස් කර ගැනීම වෙනුවෙන් සෞදි අරාබි රජයට මෙන්ම, ඒ සඳහා ජාති, ආගම්, පක්ෂ, පාට ආදී කිසිදු භේදයකින් තොරව මැදිහත් වූ සියලුදෙනාටද විශේෂ ස්තූතිය හිමි විය යුතු බව ජනාධිපතිවරයා වැඩිදුරටත් සඳහන් කර සිටියා.
අනෝජන් සිවරාසා මේ වන විට යහපත් සෞඛ්‍ය තත්ත්වයෙන් පසුවන බව ඔහුගේ දෙමාපියෝ ජනාධිපතිවරයා වෙත දැනුම් දුන්නා.
තම පුතණුවන් මරණ දඬුවමින් මුදා ගෙන සියලු චෝදනාවලින් නිදහස් කර ගැනීම සඳහා මුල සිටම මැදිහත් වූ ජනාධිපති අනුර කුමාර දිසානායකට මෙන්ම, විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍රටත්, සෞදි අරාබියේ ශ්‍රී ලංකා තානාපති ඕ.එල්. අමීර් අජ්වාඩ් ඇතුළු කාර්ය මණ්ඩලයටත්, සෞදි අරාබිය වෙත ගොස් නීතිමය වශයෙන් මැදිහත්වීම් සිදු කළ නීතිඥවරුන් ඇතුළු සමස්ත ශ්‍රී ලාංකිකයන්ටත් අනෝජන් සිවරාසාගේ මව මෙහිදී සිය කෘතඥතාව පළ කළා.
ජනාධිපතිවරයා පළමුවරට හමු වූ අවස්ථාවේ දී ලබාදුන් පොරොන්දුව පරිදි අනෝජන් සිවරාසා නිදහස් කර ගැනීමට මැදිහත් වීම පිළිබඳව ස්තූතිය පළ කළ සමාජ ක්‍රියාකාරී රාජ්කුමාර් රජීව්කාන්ත්, මේ කාලසීමාව තුළදීම බංග්ලාදේශ ජාතික යුවළකට මරණ දඬුවම ක්‍රියාත්මක කිරීමේ සිදුවීම හේතුවෙන් අනෝජන් සිවරාසාගේ දෙමව්පියන් දැඩි මානසික පීඩනයකට පත්ව සිටි බවද සඳහන් කළේ.
