උතුරු-දකුණු ප්රවාහන කොරිඩෝව පුළුල් කරමින් රුසියාව හා යුරෝපය සම්බන්ධ කරන තවත් කොරිඩෝවක් නිර්මාණය කිරීම සඳහා ඉන්දියාව, ඉරානය සහ ආර්මේනියාව යන රටවල ජ්යෙෂ්ඨ නිලධාරීන් ආර්මේනියානු අගනුවර යෙරෙවන්හි දී රැස් වී තිබෙනවා.
දූත පිරිස මෙහෙයවනු ලැබුවේ ආර්මේනියාවේ නියෝජ්ය විදේශ අමාත්යවරයා, ඉරානයේ විදේශ අමාත්යවරයාගේ සහකාරවරයා සහ ඉන්දීය විදේශ කටයුතු අමාත්යාංශයේ සම ලේකම්වරයා විසින්.
නව දිල්ලිය සමඟ ඇති සබඳතා මූලෝපායික මානයක් අත්පත් කර ගනිමින් සිටින ආර්මේනියාව, රුසියාව සහ යුරෝපය සමඟ ඉන්දීය වෙළඳුන් සම්බන්ධ කිරීම සඳහා උතුරු-දකුණු ප්රවාහන කොරිඩෝවට සමාන්තරව ඉරානය හරහා පර්සියානු ගල්ෆ්-කළු මුහුද කොරිඩෝව යෝජනා කර ඇති බව පසුගිය මාර්තු මාසයේදී වාර්තා වුණා.
පසුගියදා පැවති රැස්වීමේදී, ආර්මේනියානු විදේශ අමාත්යාංශය ත්රෛපාර්ශ්ව ආර්ථික ව්යාපෘති සහ කලාපීය සන්නිවේදන මාර්ග පිළිබඳ වැඩි අවධානයක් යොමුකර තිබෙනවා.
එසේම සංස්කෘතිය හා මිනිසුන් අතර සම්බන්ධතා ගැඹුරු කිරීමේ අපේක්ෂාවන් මෙන්ම විවිධ ක්ෂේත්රවල ත්රෛපාර්ශ්වික සහයෝගීතාව පිළිබඳව ද එහිදී සාකච්ඡා වී ඇති බවයි වාර්තා වන්නේ.
ඒ, සඳහා අඛණ්ඩ උපදේශනපැවැත්වීමට රටවල් තුනම තීරණය කර ඇති බව විදෙස් මාධ්ය වාර්තා කළා.
ආර්මේනියානු අමාත්යවරුන්ගේ සංචාර කිහිපයක් සහ යෙරෙවන් වෙත ඉන්දියාවේ ආරක්ෂක අපනයනයන් ඉහළ යෑමත් සමඟ ආර්මේනියාව සමඟ ඉන්දියාවේ සබඳතා පුළුල් වෙමින් තිබෙනවා.
ඉන්දියාව සහ ඉරානය අතර ද ඓතිහාසික සබඳතා පවතින අතර උතුරු-දකුණු ප්රවාහන කොරිඩෝව සහ චබහාර් වරාය කෙරෙහි ඔවුන්ගේ විශේෂ අවධානයක් යොමු කෙරෙන බව විදෙස් මාධ්ය වාර්තා කරනවා.
ඉරානයේ චබහාර් වරාය සංවර්ධනය සඳහා ආධාර කිරීමට ඉන්දියාව ඩොලර් මිලියන 25ක් වටිනා උපකරණ ලබා දී ඇති අතර ජංගම දොඹකර හයක් ද ලබා දී ඇති බවයි පැවසෙන්නේ.
මෙම වරාය ඉන්දියාව,මධ්යම ආසියාව සහ ඇෆ්ගනිස්ථානයට ප්රවේශ වීමට දොරටුවක් ලෙස ක්රියා කරනවා.
