රටේ සෑම ජන කොටසක් ම සහභාගි කර ගනිමින්, සංකේන්ද්රණය වී ඇති ආර්ථිකය ප්රසාරණය කිරීමේ අරමුණින් මෙවර අයවැය ඉදිරිපත් කරන බව ජනාධිපති අනුර කුමාර දිසානායක මහතා පවසනවා.
ජනාධිපතිවරයා මේ බව සඳහන් කළේ; 2025 අයවැය සකස් කිරීම සම්බන්ධයෙන් මුදල් අමාත්යාංශය නිලධාරීන් සමග ජනාධිපති ලේකම් කාර්යාලයේ අද (21) පැවති පූර්ව සාකච්ඡාවට එක්වෙමින්.
ඵලදායී හා කාර්යක්ෂම ලෙස ආර්ථික ක්රියාවලිය මෙහෙය වීමේ දී පොදු ප්රවාහනය විධිමත් කිරීමේ වැදගත්කම මෙන්ම විමධ්යගත මන්ත්රී අරමුදල භාවිත කළ යුතු ආකාරය පිළිබඳව ද මෙහිදී සාකච්ඡා කෙරුණා.
පොදු ප්රවාහනය ශක්තිමත් කිරීම සඳහා ආණ්ඩුවේ මැදිහත් වීමේ ආකාරය ද, පහසුකම් සැලසීමේ ක්රියාමාර්ග ද මේ සාකච්ඡාවේ දී සලකා බැලුණු බවයි වාර්තා වන්නේ.
පහුගිය රජයන් විමධ්යගත අරමුදලට විශාල මුදල් ප්රමාණ වෙන් කළ ද එම මුදල් ඵලදායී ව්යාපෘතිවලට යොදවා නොමැති බවත්, එම නිසා විමධ්යගත අරමුදලේ ප්රතිපාදන ජාතික ව්යාපෘතිවලට යොදා ගත හැකි අයුරින් වෙන් කිරීම පිළිබඳව ද මෙහිදී අවධානයට ලක් වුණා.
වී මිල දී ගැනීම සඳහා සහල් නිෂ්පාදකයන්ට ලබා දෙන ණය මුදල් වසරක් ඇතුළත නැවත අය කර ගැනීමටත්, එම ව්යාපාරිකයන් සතුව තිබෙන සහල් තොග නියාමනය කිරීම පිළිබඳවත් මෙහිදී සාකච්ඡා වූ බවයි ජනාධිපති මාධ්ය අංශය නිවේදනය කළේ.
ඉහළ ස්ථරයේ තිබෙන ආර්ථිකය පහළම ස්ථරය දක්වා විහිදී යන පරිදි ප්රසාරණය කළ යුතු බව පෙන්වා දුන් ජනාධිපතිවරයා සියලුම පළාත්වලට බෙදී යන ආර්ථික සැලසුමක් සකස් කිරීමේ වැදගත්කම ද මෙහිදී සඳහන් කළා.
දැනට පවතින සහනාධාර ලබා දෙන ක්රමවේද අඩුපාඩු සහිත බැවින් එම අඩුපාඩු හඳුනා ගනිමින් සහනාධාර අවශ්ය ප්රජාව නිශ්චය කර ගැනීමේ හා එම ක්රියාවලිය කඩිනම් කිරීමේ අවශ්යතාව ද මෙහිදී ජනාධිපතිවරයාගේ අවධානයට ලක් වුණා.
කම්කරු අමාත්ය සහ ආර්ථික සංවර්ධන නියෝජ්ය අමාත්ය ආචාර්ය අනිල් ජයන්ත ප්රනාන්දු මහතා ද , ජනාධිපති ලේකම් ආචාර්ය නන්දික සනත් කුමානායක, මුදල් අමාත්යංශ ලේකම්, මහින්ද සිරිවර්ධන, ජනාධිපති ජ්යෙෂ්ඨ අතිරේක ලේකම් රසල් අපෝන්සු, නියෝජ්ය මහා භාණ්ඩාගාර ලේකම් ඒ.කේ.සෙනෙවිරත්න යන මහත්වරු ඇතුළු නිලධාරීන් පිරිසක් ද මෙම අවස්ථාවට එක්ව සිටියා.
