දෝහා සංසදයට සහභාගී වීම සඳහා ශ්‍රී ලංකා විදේශ කටයුතු අමාත්‍යවරයා කටාර් රාජ්‍යයේ නිල සංචාරයක නිරත වීමට නියමිතව තිබෙනවා.
හෙට (09) සිට ලබන 12වනදා දක්වා ඇමතිවරයා මෙම චරිකාවේ නිරතවන බවයි විදේශ කටයුතු අමාත්‍යංශය නිවේදනය කළේ.
‘බහු ධ්‍රැවීය ජාත්‍යන්තර අනුපිළිවෙලෙහි BRICS නැගී එන බලපෑම’ යන මාතෘකාව යටතේ අමාත්‍යවරයා ඉහළ මට්ටමේ මණ්ඩල සැසියට සහභාගී වනු ඇති.
දෝහා සංසදය යනු කටාර් රාජ්‍යය විසින් අනුග්‍රහය දක්වන ගෝලීය වේදිකාවක් වන අතර, ලෝකය මුහුණ දෙන තීරනාත්මක අභියෝග සාකච්ඡා කිරීමට නායකයින් සහ ප්‍රතිපත්ති සම්පාදකයින් එකට ගෙන ඒම සහ නව්‍ය සහ ක්‍රියාකාරී ජාලයන් ගොඩනැගීම අරමුණු කර ගෙන ක්‍රියාත්මක වනවා.
මෙම චාරිකාවේ දී ශ්‍රී ලංකා විදේශ අමාත්‍යවරයා, කටාර් රාජ්‍යයේ අග්‍රාමාත්‍යවරයා ද වන විදේශ කටයුතු අමාත්‍යවරයා හමුවීමට නියමිත අතර ද්විපාර්ශ්වික සබඳතා තවදුරටත් වැඩිදියුණු කර ගැනීම පිළිබඳව සාකච්ඡා කිරීමට නියමිතයි.
එමෙන්ම අමාත්‍යවරයා කටාර් ආයෝජන අධිකාරියේ ජ්‍යෙෂ්ඨ නිලධාරීන් සහ කටාර්හි ප්‍රමුඛ පෙළේ ව්‍යාපාරික ආයතන ද හමුවීමට නියමිත බව සඳහන්.
