ගලෙන්බිඳුනුවැව – අලුත්දිවුල් වැවේ වැව් බැම් කැඩී යාමේ අවදානමකට ලක්වීම හේතුවෙන් අවදානම් තත්ත්වයේ සිටින පවුල් රැසක් ආරක්ෂිත ස්ථාන වෙත යොමුකිරීමට පියවර ගෙන තිබෙනවා.
මේ වනවිටත් එම වැව් බැම්මේ අවදානම් ස්ථාන වැලි කොට්ට අතුරා සකස් කිරීමට යුද හමුදා සෙබළුන් කටයුතු කරමින් සිටින බවයි ගලෙන්බිදුණුවැව වාරිමාර්ග ඉංජිනේරු කාර්යාලය සඳහන් කළේ.
අලුත්දිවුල්වැවේ සොරොව්ව ආශ්රිතව වැව් බැම්මේ ඇති වී තිබෙන විශාල උමයක් හේතුවෙන් මේ වනවිට වැව් බැම්ම කැඩී යාමේ අවධානමකට ලක්ව ඇති බවයි වාර්තා වන්නේ.
ගලෙන්බිඳුනුවැව වාරිමාර්ග ඉංජිනේරු කාර්යාලයේ ප්රකාශකයකු සඳහන් කළේ මේ වනවිට වැවේ ඇති උමග ආශ්රිත ප්රදේශය වැලි කොට්ට අසුරා ආරක්ෂා කිරීමටත් පවතින අවදානම සලකා බලා වැවෙහි ජල මට්ටම අඩුමට්ටමකට ගෙන ඒමට කටයුතු කරමින් සිටින බවයි.
අක්කර අඩි 7,200ක ජල ධාරිතාවකින් යුත් මෙම ජලාශයේ; පසුගිය දිනවල ඇදහැළුණු අධික වර්ෂාවත් සමඟ වැඩි ජල ප්රමාණයක් එක්රැස්ව ඇති බවයි වාර්තා වන්නේ.
ගම්වාසීන් පවසන්නේ කලක සිට පැවති කුඩා ජල කාන්දුවක් මෙලෙස වර්ධනය වී බැම්ම කැඩී ඇති බවයි.
මෙලෙස වැව් බැම්ම අනතුරුදායක තත්ත්වයක පැවතීමත් සමඟ ප්රදේශයේ පිහිටි දිවුල්වැව මහ විදුහල වසා දැමීමට බලධාරීන් පියවර ගෙන තිබෙනවා.
