ශ්‍රී ලංකා පොලිසියේ පොලිස් නිල සුනඛ කොට්ඨාශය පස් අවුරුදු සැලැස්මක් යටතේ නවීන තාක්ෂණය සමඟින් සංවර්ධනය කිරීමට කටයුතු යොදා ඇති බව ජ්‍යෙෂ්ඨ නියෝජ්‍ය පොලිස්පති ප්‍රියන්ත වීරසූරිය පවසනවා.
ඒ, අනුව මෙම පොලිස් නිල සුනඛ කොට්ඨාශයේ සිටින නිලධාරීන් සහ නිල සුනඛයින් සංඛ්‍යාත්මකව වැඩිකර නවීන තාක්ෂණය ද මුසු කරගනිමින් ජාත්‍යන්තර මට්ටමේ පොලිස් නිල සුනඛ කොට්ඨාසයක් දක්වා පුළුල් කරන බවයි ඔහු සඳහන් කළේ.
මහනුවර අස්ගිරිය පොලිස් ක්‍රීඩාංගනයේ පැවති 75 වැනි පොලිස් නිල සුනඛ සැමරුම් වැඩසටහනට ඊයේ (04) එක්වෙමින් ජ්‍යෙෂ්ඨ නියෝජ්‍ය පොලිස්පතිවරයා මේ බව සඳහන් කළා.
අපරාධ සහ මත්ද්‍රව්‍ය අත්අඩංගුවට ගැනීම ඇතුළු පොලිසියට පැවරෙන රාජකාරී කටයුතුවලට සහායක් ලෙස යොදා ගන්නා පොලිස් නිල සුනඛ සේවය වර්තමානයේ දී ඩෙංගු මදුරු කීටයන් සොයාගැනීම දක්වා පැමිණ ඇති බවත්, ඉදිරියේ දී ලොව අනිකුත් රටවල මෙන් පිළිකා වැනි විවිධ ලෙඩ රෝග හඳුනාගැනීම මෙන්ම සම්භාහන කටයුතු සදහා ද මෙම සේවාව ව්‍යාප්ත කිරීමේ හැකියාව තිබෙන බව ද ඔහු මෙහිදී වැඩිදුරටත් පැවසුවා.
1948 වසරේ දී පොලිස් කොස්තාපල්වරු තිදෙනෙක් සහ පොලිස් නිල සුනඛයන් දෙදෙනකුගෙන් ආරම්භ කළ පොලිස් නිල සුනඛ සේවය 1960 වසරේ වෙනම අංශයක් ලෙසත්, පසුව 1990 දී වෙනම පොලිස් කොට්ඨාශයක් බවට පත්කර තිබෙනවා.
අද වන විට මෙම කොට්ටාශයේ නිලධාරින් 325ක් සහ පොලිස් නිල සුනඛයන් 265ක් සේවයේ යෙදී සිටිනවා.
නිල සුනඛ කොට්ඨාශය හා සම්බන්ධව අපරාධ මැඩලීම, පුපුරණ ද්‍රව්‍ය හා මත්ද්‍රව්‍ය සොයාගැනීම, ආන්දෝලනාත්මක අපරාධ විසඳීම ඇතුළුව විශිෂ්ට දක්ෂතා දැක් වූ නිලධාරීන් ඇගයීම ද මෙහිදී සිදුවුණා.
