මහජන චීන සමූහාණ්ඩුවේ ජාතික මහජන කොංග්රසයේ (NPC) ස්ථාවර කමිටු සාමාජික සහ මහජන චීන සමූහාණ්ඩුවේ ආණ්ඩුක්රම ව්යවස්ථා සහ නීති කමිටුවේ සභාපතිනි මහාචාර්ය, ෂින් චුන්යිංගේ (Xin Chunying) ප්රධානත්වයෙන් යුත් නියෝජිත පිරිසක් පසුගියදා පාර්ලිමේන්තුවේදී කථානායක වෛද්ය ජගත් වික්රමරත්න හමුවුණා.
නියෝජිත පිරිසට මහජන චීන සමූහාණ්ඩුවේ ස්ථාවර කමිටු සාමාජික සහ ආණ්ඩුක්රම ව්යවස්ථා සහ නීති කමිටුවේ උප සභාපති කොන්ග් බින් (Cong Bin), ආණ්ඩුක්රම ව්යවස්ථා සහ නීති කමිටුවේ සාමාජික ගාඕ සිචෙන්ග් (Gao Zicheng) ඇතුළු නිලධාරීන් කිහිප දෙනෙක් ද ඇතුළත් වුණා.
පාර්ලිමේන්තු මහලේකම් කුෂානි රෝහණදීර ද මෙම අවස්ථාවට සහභාගී වී සිටියා.
නියෝජිත පිරිස පිළිගනිමින්, කථානායක වෛද්ය ජගත් වික්රමරත්න, ශ්රී ලංකාව සහ චීනය අතර වසර දෙදහසකට අධික කාලයක් පුරා පවතින දිගුකාලීන ද්විපාර්ශ්වික සබඳතා සිහිපත් කළා.
එසේම දෙරට අතර ආරම්භ වූ නිල රාජ්ය තාන්ත්රික සබඳතාවල 70 වන සංවත්සරය 2027 වසරේදී සැමරීමට නියමිත බවත් ඔහු පවසා සිටියා.
දිගුකාලීන මිතුරෙක් ලෙස දශක ගණනාවක් පුරා ශ්රී ලංකාවට ලබා දුන් අඛණ්ඩ සහයෝගයට කථානායකතුමා චීන රජයට සිය කෘතඥතාව පළ කළා.
‘දිට්වා’ සුළි කුණාටුවෙන් පසු අවස්ථාව, මෑත කාලීන ආර්ථික අර්බුදය සහ ජාත්යන්තර සහ බහුපාර්ශ්වික සංසදවලදී ශ්රී ලංකාවට ලබාදුන් සහයෝගය ඇතුළු මෙරට දුෂ්කර කාලවලදී චීනය දැක්වූ සහාය ඔහු විශේෂයෙන් සිහිපත් කරනු ලැබුවා.
මහාචාර්ය ෂින් චුන්යිං ශ්රී ලංකාව සහ චීනය අතර ශක්තිමත් සහ කල් පවතින සබඳතා නැවත අවධාරණය කළ අතර ශ්රී
ලංකාවේ අඛණ්ඩ සංවර්ධන උත්සාහයන් පිළිබඳ ප්රශංසා කළා.
දෙරටේ ව්යවස්ථාදායක අතර පාර්ලිමේන්තු රාජ්ය තාන්ත්රිකභාවය ශක්තිමත් කිරීමේ වැදගත්කම ද ඇය අවධාරණය කළ අතර අන්යෝන්ය ප්රතිලාභ සඳහා ද්විපාර්ශ්වික සහයෝගීතාව තවදුරටත් වැඩි කිරීම සඳහා චීනය අඛණ්ඩව
සහය දක්වන බව පවසා සිටියා.
අනතුරුව, දූත පිරිස ශ්රී ලංකා – චීන පාර්ලිමේන්තු මිත්රත්ව සංගමයේ සභාපති, ප්රවාහන, මහාමාර්ග සහ නාගරික සංවර්ධන අමාත්ය, පාර්ලිමේන්තුවේ සභානායක බිමල් රත්නායක හමුවී අන්යෝන්ය වශයෙන් වැදගත් කරුණු පිළිබඳව සුහද සාකච්ඡාවක නිරත වුණා.
අභියෝගාත්මක කාලවලදී ශ්රී ලංකාවට ලබා දුන් සහාය පිළිබඳව අමාත්යවරයා චීනයට සිය කෘතඥතාව පළකර සිටියා.
දෙරට අතර පාර්ලිමේන්තු හුවමාරු වැඩසටහන් වැඩි දියුණු කිරීම, ප්රතිපත්ති සම්පාදනයේ සහයෝගීතාව සහ ආයතනික සබඳතා ශක්තිමත් කිරීම කෙරෙහි මෙහිදී අවධානය යොමු වුණා.
ශ්රී ලංකා – චීන පාර්ලිමේන්තු මිත්රත්ව සංගමයේ සාමාජික පාර්ලිමේන්තු මන්ත්රීවරයන් වන තනුර දිසානායක සහ නීතිඥ අනුෂ්කා තිලකරත්න ද මෙම සාකච්ඡාවට සහභාගී වී තිබෙනවා.
ඉන්පසුව, දූත පිරිස අධිකරණ සහ ජාතික ඒකාබද්ධතා කටයුතු පිළිබඳ අමාත්යාංශයීය උපදේශක කාරක සභාවේ සහ රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ ඒකාබද්ධ රැස්වීමකට සහභාගී වී සිටියා.
මෙම රැස්වීමට අධිකරණ සහ ජාතික ඒකාබද්ධතා කටයුතු පිළිබඳ අමාත්යාංශයීය උපදේශක කාරක සභාවේ සභාපති, අධිකරණ සහ ජාතික ඒකාබද්ධතා අමාත්ය නීතිඥ හර්ෂණ නානායක්කාර, රාජ්ය පාලනය, යුක්තිය සහ සිවිල් ආරක්ෂණය පිළිබඳ ආංශික අධීක්ෂණ කාරක සභාවේ සභාපති පාර්ලිමේන්තු මන්ත්රී වෛද්ය නජිත් ඉන්දික ඇතුළු මෙම කාරක සභා ද්විත්වය නියෝජනය කරන පාර්ලිමේන්තු මන්ත්රීවරු පිරිසක් සහභාගී වුණා.
ශ්රී ලංකාවේ අධිකරණ සහ නීති අංශ සංවර්ධනය සඳහා චීනය අඛණ්ඩව දක්වන සහයෝගය පිළිබඳව සභාපතිවරු දෙදෙනාම කෘතඥතාව පළ කළා.
එසේම මෙහිදී දෙරටේ නීතිමය සහ අධිකරණ භාවිතයන්, පාලනය සහ ආයතනික සහයෝගීතාව පිළිබඳව අදහස් හා අත්දැකීම් ද හුවමාරු කර ගැනීම සිදු වුණා.
අනතුරුව කථානායකතුමා විසින් දූත පිරිසට දිවා භෝජන සංග්රහයක් ද පවත්වනු ලැබුවා.
