ගල්නෑව හෙලබදුගම ප්‍රදේශයේ කුඹුරු යායකදී උදැල්ලකින් පහරදී පුද්ගලයෙකු ඝාතනය කිරීමට සම්බන්ධ සැකකරුවෙකු පොලිස් අත්අඩංගුවට ගෙන තිබෙනවා.
ඊයේ සවස සැකකරු වෙල් යායේදී වයස්ගත අඹු සැමි යුවළකට මෙලෙස උදැල්ලකින් පහරදී ඇති බවටයි අනාවරණ වී ඇත්තේ.
එහිදී බරපතල තුවාල ලැබූ පිරිමි පුද්ගලයා ගල්නෑව රෝහලට ඇතුලත් කිරීමෙන් අනතුරුව ජීවිතක්ෂයට පත්ව තිබෙනවා.
කාන්තාව වැඩිදුර ප්‍රතිකාර සඳහා අනුරාධපුර මහ රෝහලට මාරු කර යවා ඇති බවයි පොලිසිය සඳහන් කළේ.
මියගොස් ඇත්තේ හෙලබදුගම ප්‍රදේශයේම පදිංචි 72 හැවිරිදි පුද්ගලයෙක් වන අතර තුවාල ලබා ඇත්තේ එම පුද්ගලයාගේ බිරිඳ වන 65 හැවිරිදි කාන්තාවක්.
මියගිය පුද්ගලයා සහ සැකකරු අතර කුඹුරු ඉඩමක් සම්බන්ධයෙන් ඇති වූ ආරවුලක් දුරදිග යාමෙන් මෙම පහරදීම සිදුව ඇතැයි සඳහන්.
සැකකරු ගල්නෑව පොලිසිය විසින් අත්අඩංගුවට ගෙන ඇති අතර ඔහු අධිකරණයට ඉදිරිපත් කිරීමට නියමිතයි.
අත්ඩංගුවට ගත් සැකකරු ද එම ප්‍රදේශයේම පදිංචි 60 හැවිරිදි අයෙක්.
කැකිරාව මහේස්ත්‍රාත්වරයා විසින් මියගිය පුද්ගලයාගේ මෘත ශරීරය සම්බන්ධයෙන් මහේස්ත්‍රාත් පරීක්ෂණය සිදු කර පශ්චාත් මරණ පරීක්ෂණය සඳහා සිරුර අනුරාධපුර රෝහලට යොමු කර තිබෙනවා.
ගල්නෑව පොලිසියයි විමර්ශ සිදු කරන්නේ.
