තව ත් ශ්‍රී ලාංකිකයෙකු විදෙස් රටකදී ඝාතනයට ලක්වූ පුවතක් වාර්තා වී තිබේ.
ඔහු කටාර් රාජ්‍යයේ දෝහා නගරයේ අල් වහාබ් ප්‍රදේශයේ නිවාස සංකීර්ණයක ආරක්ෂක නියාමකවරයෙකු ලෙස සේවය කරමින් සිටි ශ්‍රී ලාංකිකයෙකි.
කටාර් මාධ්‍ය වාර්තාවල දැක්වෙන්නේ, බදාදා පස්වරුවේ ඔහුට වෙඩි තබා ඝාතනය කර ඇති බව ය.
අදාළ නිවාස සංකීර්ණයේ සේවයේ නිරතව සිටියදී මෝටර් රථයකින් තවත් තරුණියක සමග පැමිණ නිවාස සංකීර්ණයට ඇතුළු වීමට උත්සහ කළ තරුණයෙකුගෙන් හැඳුනුම්පත ඉල්ලා සිටි අවස්ථාවේ තරුණයා එය ප්‍රතික්ෂේප කර තිබිණි.
ඒ අනුව, අදාළ ශ්‍රී ලාංකික ආරක්ෂක නියාමකවරයා මෝටර් රථය නිවාස සංකීර්ණයට ඇතුළු කිරීමට අවසර නොදීම හේතුවෙන් මෙම ඝාතනය සිදු කර ඇතැයි වාර්තා වේ.
මෙම ශ්‍රී ලාංකිකයා පිළිබඳව තොරතුරු විමසීමට Doha News ආයතනය කටාර්හි පිහිටි ශ්‍රී ලංකා තානාපති කාර්යාලය අමතා ඇතත් ඔවුන් තොරතුරු ලබා දීම ප්‍රතික්ෂේප කළ බව එම පුවත් සේවය සඳහන් කර තිබේ.
මේ අතර, මෙම ඝාතනය සිදු කළ සැකකාර කටාර් ජාතික තරුණයා අත්අඩංගුවට ගෙන ඇතැයි මාධ්‍ය වාර්තාවල දැක්වේ.
ජීවත් වීම සඳහා ආරක්ෂිත ම රටවල් අතරින් ප්‍රමුඛත්වය ලබා ඇති රටක් වන කටාර් රාජ්‍යයේ වෙඩි තැබීම් ඉතා දුර්ලභ ය. මේ හේතුවෙන් මෙම ඝාතනය සම්බන්ධයෙන් එරට මාධ්‍යවල සහ ජනතාවගේ දැඩි අවධානයක් යොමුව තිබේ.
