නතර වී තිබු ආනයනික සහල් නිෂ්කාශන කටයුතු යළි ආරම්භ වී තිබෙනවා.
අද (26) සිට එම කටයුතු ආරම්භ කළ බවයි ශ්‍රී ලංකා රේගු අධිකාරිය පැවසුවේ.
ඒ අනුව සහල් මෙරටට ආනයනය කළ ව්‍යාපාරිකයින්ට අද පෙරවරුවේ සිට සිය සහල් නිෂ්කාශනය කරගැනීමේ කටයුතු හැකි වන බව රේගු මාධ්‍ය ප්‍රකාශක අතිරේක රේගු අධ්‍යක්ෂ ජනරාල් සිවලි අරුක්ගොඩ මහතා පැවසුවා.
රට තුළ පවතින සහල් ගැටලුවට පිළියමක් වශයෙන් පෞද්ගලික අංශයේ ව්‍යාපාරිකයින්ට සෘජුවම සහල් ආනයනය කිරීම සඳහා දෙසැම්බර් මස 4වන දින සිට 20 වන දින දක්වා අවසර ලබා දී තිබූ අතර එම කාලය තුළ සහල් මෙට්‍රික් ටොන් 67,000ක් ආනයනය කිරීමට පියවර ගෙන තිබුණා.
කෙසේ වෙතත් පසුගියදා පැවති කැබිනට් මණ්ඩලයේ දී සහල් ආනයනය කිරීම සඳහා ලබා දී තිබු කාලය ජනවාරි මස 10 වන දින දක්වා දීර්ඝ කිරීමට කටයුතු කළ අතර ඊට අදාළ ගැසට් නිවේදනය පසුගිය 24 වන දින නිකුත් කරනු ලැබුවා.
ඒ අනුව මෙරටට ආනයනය කරන ලද සහල් යළිත් අද දිනයේ සිට නිෂ්කාශනය කිරීමේ කටයුතු සිදු කරන බව රේගු දෙපාර්තමේන්තුව නිවේදනය කළා.
මේ අතර රාජ්‍ය වාණිජ විවිධ නීතිගත සංස්ථාව හරහා රජය ආනයනය කළ මෙට්‍රික් ටොන් 780ක පළමු සහල් තොගය ඊයේ (25) රාත්‍රී කොළඹ වරාය වෙත ළඟාවීමට නියමිතව තිබු බව කෘෂිකර්ම නියෝජ්‍ය අමාත්‍ය නාමල් කරුණාරත්න මහතා සඳහන් කළා.
එම සහල් තොගය කඩිනමින් වෙළෙඳපොළ වෙත නිකුත් කිරීමට කටයුතු කරන බවයි නියෝජ්‍ය අමාත්‍යවරයා සඳහන් කළේ.
