අහුලාගත් ණය කාඩ්පතෙන් පාසල් සිසුවා ලක්ෂ හතර හමාරක බඩු අරන් (වීඩියෝ)

හැටන් නගරයේ බිමට වැටී තිබූ ණය කාඩ්පතක් අහුලාගෙන එය භාවිත කරමින් රුපියල් ලක්ෂ හතර හමාරක් පමණ වටිනා භාණ්ඩ මිලදී ගත් පාසල් සිසුවෙක් අත්අඩංගුවට ගෙන තිබෙනවා.

අදාළ සිසුවා විසින් පසුගිය පළමු වනදා හැටන් නගරයේ වැටී තිබූ ණයකාඩ් පතක් අහුලාගෙන ඉන් සුපිරි වෙළදසැලකින් ආහාර මිල දී ගෙන ඇති අතර පසුව මහනුවර ප්‍රදේශයෙන් දුරකථන අමතර උපාංග කිහිපයක්, කායවර්ධන පෝෂ පදාර්ථ සහ පාවහන් යුගළ කිහිපයක් මිල දී ගෙන ඇති බවයි වාර්තා වන්නේ.

අස්ථාන ගත වූ ණය කාඩ්පතේ හිමිකරු වූ බගවන්තලාව ප්‍රදේශයේ පදිංචි පුද්ගලයෙක් මේ සම්බන්ධයෙන් හැටන් පොලිසියට සිදුකළ පැමිණිල්ලකට අනුව ඒ සම්බන්ධයෙන් පරීක්ෂණ අරඹා තිබෙනවා.

සැකකාර සිසුවා භාණ්ඩ මිල දී ගෙන තිබූ එක් ආයතනයකින් නිකුත් කර තිබූ වගකීම් සහතිකයකට ලබා දී තිබූ ඔහුගේ සත්‍ය නම, ලිපිනය සහ දුරකථන අංකය අනුව විමර්ශන ඇරඹු පොලිසිය අද (06) දිනයේ සිසුවා අත්අඩංගුවට ගෙන ඇති බවයි වාර්තා වුණේ.

මේ අතර අත්අඩංගුවට ගැනුණු සිසුවා විසින් මිල දි ගත් භාණ්ඩ ඔහුගේ මුහුණු පොත ඔස්සේ ප්‍රසිද්ධකර තිබූ බව ද පොලිසිය පැවසුවා.

මෙලෙස අත්අඩංගුවට ගෙන ඇත්තේ හැටන් ප්‍රදේශයේ ප්‍රධාන පාසලක 13 වසරේ අධ්‍යාපන ලබන සිසුවෙක්.

සැකකාර පාසල් සිසුවා අද (06) දින හැටන් මහෙස්ත්‍රාත් අධිකරණය වෙත ඉදිරිපත් කිරීමෙන් පසු රුපියල් ලක්ෂ 05ක ශරීර ඇපමත මුදාහැර ඇති අතර, එම නඩුව මේ මස 18 වනදා යළි කැඳවීමටයි නියෝග කර ඇත්තේ.