බොරැල්ල කනත්ත ආසන්නයේ අද (28) උදෑසන සිදු වූ රිය අනතුර සම්බන්ධයෙන්, අනතුර සිදුකළ දොඹකරයේ හිමිකරු ද අත්අඩංගුවට ගත් බව පොලිසිය පවසනවා.
බොරැල්ල පොලිසිය මඟින් අත්අඩංගුවට ගෙන ඇති එම පුද්ගලයා හෙට (29) දිනයේ කොළඹ අලුත්කඩේ අංක 02 මහේස්ත්රාත් අධිකරණය වෙත ඉදිරිපත් කිරීමට නියමිත බවයි වාර්තා වුණේ.
මෙම අනතුර සම්බන්ධයෙන් දොඹකරය පැදවූ රියදුරු ද අත්අඩංගුවට ගැනුණු අතර, ඔහු ද එම අධිකරණයට හෙට දිනයේ ඉදිරිපත් කරන බවයි පොලිසිය සඳහන් කළේ.
අත්අඩංගුවට ගැනුණු දොඹකරයේ රියදුරු වෛද්ය පරික්ෂාවකට යොමු කෙරුණු අතර, අනතුර සිදුවන අවස්ථාවේ දී ඔහු ගංජා පානය කර සිට ඇති බවට එහිදී හෙළිව තිබෙනවා.
දොඹකරයක් පාලනයෙන් ගිලිහී මර්ගයේ ගමන්ගත් තවත් රථ වාහන කිහිපයක් ගැටීමෙන් සිදු වූ මෙම අනතුරින් එක් පුද්ගලයෙක් මියගොස් තවත් 06 දෙනෙකු තුවාල ලැබුවා.
එලෙස තුවාල ලැබූවන් අතර පොලිස් නිලධාරීන් දෙදෙනෙක් ද වන බවයි පොලිසිය සඳහන් කළේ.
ඔවුන් අපරාධ වාර්තා කොට්ඨාසයට සහ අල්ලස් හා දූෂණ විමර්ශන කොට්ඨාසයට අනුයුක්තව රාජකාරී කළ පොලිස් නිලධාරීන් දෙදෙනෙක් බවයි වාර්තා වුණේ.
මෙම අනතුරින් මියගිය පුද්ගලයා අතුරුගිරිය ප්රදේශයේ පදිංචිව සිටි වයස අවුරුදු 62ක පුද්ගලයෙක් බවයි පොලිසිය වැඩිදුරටත් පැවසුවේ.
මෙම අනතුර සම්බන්ධයෙන් සිදුකළ විමර්ශනයේ දී අනාවරණය වී ඇත්තේ දොඹකරයේ රියදුරුගේ නොසැලකිලිමත්කම සහ අපරික්ෂාකාරී රිය ධාවනය බවයි.
අනතුරින් මෝටර් රථ තුනකට සහ යතුරුපැදි 06කට බරපතළ හානි සිදුව තිබෙනවා.
