පවතින අයහපත් කාලගුණ තත්ත්වය හේතුවෙන් ප්‍රධාන ගංඟා කිහිපයක් දිවයිනේ ප්‍රදේශ රැසකින් පිටාර ගලා තිබෙනවා.
මේ හේතුවෙන් එම ප්‍රදේශවලට සුළු ගංවතුර තත්ත්වයක් හටගෙන ඇති බවයි වාර්තා වන්නේ.
ඒ, අනුව අද (02) උදෑසන කැළණි ගඟ පිටාර ගැලීම හේතුවෙන් බියගම – කැළණි මාර්ගයේ මල්වාන හන්දිය ජලයෙන් යට වී තිබෙනවා.
එමෙන්ම ගිං ගඟ ගාල්ල – මාපලගම ප්‍රදේශයෙන් මේ වනවිට පිටාර ගලමින් පවතින බවයි අප ප්‍රාදේශීය වාර්තාකරු සඳහන් කළේ.
මේ හේතුවෙන් මාපලගම ප්‍රදේශයේ පහත්බිම් ජලයෙන් යටවෙමින් පවතින අතර, මාපලගම – පිටිගල ප්‍රධාන මාර්ගයේ රථවාහන ගමනා ගමනයට ද බාධා එල්ල වී තිබෙනවා.
මේ අතර ගිං ගඟ පිටාර ගැලීමෙන් හිනිදුම, උඩුගම, නාගොඩ, බද්දේගම, ආදී ප්‍රදේශවල පහත් බිම් රැසක් යට වී තිබෙනවා.
අද (02) උදෑසන 9.00 වන විට ගිං ගඟේ බද්දේගම ජල මාපකයේ අගය මීටර් 04.22ක් ලෙස සටහන්ව තිබුණා.
එමෙන්ම නිල්වලා ගඟේ අතු ගංගාවක් වන කිරම ඔය පිටාර ගැලීමෙන් හක්මන – මුලටියන මාර්ගය දෙයියන්දර ඕවිලාන ප්‍රදේශය ජලයෙන් යට වී ඇති බවයි අප ප්‍රාදේශීය වාර්තාකරු පැවසුවේ.
මේ හේතුවෙන් කොටපොල සිට මුලටියන හරහා මාතර මාර්ගය මාකඳුර නගරයෙන් යට වී ඇති බවයි වාර්තා වන්නේ.
මේ අතර සිටිනාමලුව මහවැව පිටාරගැලීම නිසා තංගල්ල – බෙලිඅත්ත මාර්ගය ජලයෙන් යට වී ඇති බව මේ වනවිට තොරතුරු වාර්තා වනවා.
