මෙරට ටැක්සි රියදුරන්ට රාජ්ය වගකීම සහිත විශ්රාම වැටුප් ක්රමයක් හඳුන්වා දීමේ අරමුණින් HelaGo ශ්රී ලාංකීය ටැක්සි සමාගම සහ ශ්රී ලංකා සමාජ ආරක්ෂණ මණ්ඩලය අතර අවබෝධතා ගිවිසුමක් අත්සන් කර තිබෙනවා.
දීර්ඝ කාලයක් තිස්සේ ටැක්සි රියදුරන් මුහුණ දෙන ප්රධාන ගැටළුවක් වන අනාගත මූල්ය සුරක්ෂිතතාව සඳහා තිරසාර විසඳුමක් ලෙස මෙම ස්වෙච්ඡා විශ්රාම වැටුප් ක්රමය හඳුන්වාදීමට නියමිතයි.
යෝජිත වැඩපිළිවෙළ යටතේ HelaGo මෙහි තාක්ෂණික පහසුකම් සපයන්නා ලෙස කටයුතු කරමින්, රියදුරන්ගේ කැමැත්ත සහ මූල්ය හැකියාව අනුව ඔවුන්ගේ ආදායමෙන් විශ්රාම වැටුප් දායකත්වයන් ඍජුවම ශ්රී ලංකා සමාජ ආරක්ෂණ මණ්ඩලයට බැර කිරීමට පහසුකම් සලසනු ඇති අතර බලයලත් රාජ්ය ආයතනය ලෙස ශ්රී ලංකා සමාජ ආරක්ෂණ මණ්ඩලය විසින් මෙම අරමුදල කළමණාකරණය කරමින්, රියදුරන්ට වයස අවුරුදු 60 සම්පූර්ණ වූ පසු අදාළ විශ්රාම වැටුප් ප්රතිලාභ ලබාදීමට නියමිතයි.
මෙය හුදෙක් දෛනික ආදායමෙන් ඔබ්බට ගොස් රියදුරන්ගේ දිගුකාලීන යහපැවැත්ම වෙනුවෙන් පෞද්ගලික අංශය සහ රාජ්ය අංශය එක්ව ගත් සුවිශේෂී පියවරක් වන අතර, අදාළ තාක්ෂණික ඒකාබද්ධවීම් අවසන් වූ පසු මෙම විශ්රාම වැටුප් ක්රමයට ලියාපදිංචි වීමේ තොරතුරු රියදුරන් වෙත දැනුම් දෙන බවයි HelaGo සමාගම සඳහන් කළේ.
