මෙම වසරේ පෙබරවාරි මස 26 වැනිදා ඇල්පිටිය ප්‍රදේශයේ දී මහජන සෞඛ්‍ය පරීක්ෂකවරයෙකු වෙඩි තබා ඝාතනය කිරීමේ සිද්ධියට සම්බන්ධ ප්‍රධාන සැකකරු පොලිස් අත් අඩංගුවට ගෙන තිබෙනවා.
පොලිසිය පවසන්නේ මෙම සැකකරු සමග ඔහු මහජන සෞඛ්‍ය පරීක්ෂකවරයා ව ඝාතනයට යොදාගත් ගිනි අවිය ද සොයාගත් බවයි.
ඇල්පිටිය, පතිරාජ වත්ත ප්‍රදේශයේ පිහිටි නිවසක ජීවත් වූ මහජන සෞඛ්‍ය පරීක්ෂකවරයෙකු මෙලෙස වෙඩි තබා ඝාතනය කර තිබුණේ පසුගිය පෙබරවාරි මාසයේ උදෑසන 07ට පමණයි.
මහජන සෞඛ්‍ය පරීක්ෂකවරයාව ඝාතනයට යතුරුපැදියකින් පුද්ගලයින් දෙදෙනෙකු පැමිණ තිබුණා.
මෙලෙස මියගියේ කරන්දෙණිය ප්‍රදේශයේ මහජන සෞඛ්‍ය පරීක්ෂකවරයෙකු ලෙස සේවය කළ රොෂාන් කුමාර විතානගේ නමැති 51 හැවිරිදි අයෙක්.
මියගිය පුද්ගලයා ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ භාණ්ඩාගාරික වශයෙන් ද කටයුතු කර ඇති බව සඳහන්.
මෙවන් පසුබිමකදියි මෙම ඝාතනය සම්බන්ධයෙන් ඇල්පිටිය පොලිසිය විශේෂ විමර්ශනයක් සිදු කරමින් මාස 04කට පසුව ඝාතනයේ ප්‍රධාන සැකකරුව අත්අඩංගුවට ගැනුණේ.
