ඊයේ (01) පෙරවරුවේ බදුල්ල – මහියංගනය ප්‍රධාන මාර්ගයේ අඹගස්ඔය ප්‍රදේශයේ දී අනතුරට ලක් වූ විශ්ව විද්‍යාල සිසුන් පිරිසක් රැගත් බස් රථය; අනතුරට ලක්වීමට පෙර මාර්ගයේ ධාවනය වූ ආකාරය දැක්වෙන සමාජ මාධ්‍යයේ සැරිසරන වීඩියෝව අද (02) පස්වරුවෙන් පොලිසිය විසින් නිරීක්ෂණය කළ බව පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව පවසනවා.
ඒ, අනුව එම වීඩියෝ පටය නිරීක්ෂණය කිරීමේ දී අදාළ බස් රථය පැදවූ රියදුරා කිසියම් ආකාරයකින් මාර්ග නීති උල්ලංඝනය කරමින් බස් රථය ධාවනය කළේ නැද්ද යන්න පිළිබඳව තේරුම් ගැනීමට හැකි බවයි පොලිස් මාධ්‍ය ප්‍රකාශකවරයා සඳහන් කළේ.
අද (02) පස්වරුවේ මාධ්‍ය හමුවක් කැඳවමින් පොලිස් මාධ්‍ය ප්‍රකාශක නිහාල් තල්දූව මේ බව පැවසූ අතර; බස් රථයේ රියදුරා රෝහල් ගතව ප්‍රතිකාර ලබන බවත් ඔහුගෙන් තවමත් ප්‍රකාශ සටහන්කර ගැනීමට නොහැකි බවයි ඔහු පොලිස් මාධ්‍ය ප්‍රකාශකවරයා වැඩිදුරටත් පැවසුවේ.
කෙසේ වෙතත් මෙම අනතුර හේතුව කුමක් ද යන්න එම දර්ශන ඔස්සේ නිගමනය කළ නොහැකි බව ඔහු මාධ්‍ය හමුවේ අදහස් දවමින් සඳහන් කර සිටියා.
අනතුර සම්බන්ධයෙන් විමර්ශන සිදුකරනු ලබන විමර්ශන නිලධාරීන් මෙම වීඩියෝ පටය පිළිබඳව මේ වනවිටත් ඇතැම්විට අවදානය යොමුකර බවයි නියෝජ්‍ය පොලිස්පතිවරයා ප්‍රකාශ කළේ.
