රුපියල් තුන් කෝටි පහළොස් ලක්ෂයක් වටිනා රන් භාන්ඩ සොරාගත් කාන්තාවක් ඇතුළු සිව් දෙනෙක් පොලීසිය විසින්අත්අඩංගුවට ගෙන තිබෙනවා.හැටන් කොට්ඨාස අපරාධ විමර්ශන අංශය සඳහන් කලේ නොර්වුඩ් නගරයේ ස්වර්ණාභරණ උකස් ගන්නා ස්ථානයකින් මෙම ස්වර්ණාභරණ කිලෝ 1 1/2ක තොගය සොරාගෙන ඇති බවයි.
ඊයේ (30) සිදුකල වැටලීමකින් මෙම සැකකරුවන් අත්අඩංගුවට ගත් බවයි පොලීසිය සඳහන් කලේ.
අදාළ සොරකම පසුගිය වසරේ දෙසැම්බර් මස 09 වැනි දින සිදුකර තිබෙන බවත් සොරා ගත් රන් ආභරණ අලෙවි නොකර එක් සැකකරුවෙකු පදිංචි නෝර්වුඩ් වෙන්චර් වතුයායේ තම ගෙවත්තේ වළ දමා තිබියදී සොයා ගත් බවතයි පොලීසිය පැවසුවේ.අදාළ සොරකම සම්බන්ධයෙන් පොලීසිය පුද්ගලයින් කිහිපදෙනෙකුගෙන්ම ඇඟිලි සලකුණු ලබා ගෙන ඇති අතර ඒ ඔස්සේ වැඩිදුර විමර්ශන සිදුකර තිබෙනවා.
සැකකරුවන් විසින් සොරාගෙන තිබියදී සොයා ගත් රන් භාණ්ඩ අතර රන් මාල 54 ක් රන් අරුන්ගල් 757 ක් රන් පෙන්ඩන්ට් 177 ක් රන් මුදු
404 ක් රන් ටසල් 84 ක්, රන් අත්පළඳනා 18ක්, රන් වළලු 01 ක්, රන් කැබලි 09 ක් සොයා ගැනුණා.සිද්ධියේ ප්‍රධාන සැකකාරිය අදාළ උකස් මධ්‍යස්ථානයේ වසර 10 ක් පමණ සේවය කර ඇති බවත් , හිමිකරුවන් නිවසේ නොසිටි අවස්ථාවක උකස් මධ්‍යස්ථානයට යාබද නිවසේ සේප්පුවක තිබූ රන් භාන්ඩ ඇය අනෙක් සැකකරුවන් තිදෙනා සමග එක්ව සොරාගෙන මෙම අපරාධය සිදුකර තිබෙනවා.
සැකකරුවන් වයස අවුරුදු 35- 50ත් අතර වයස්වල පසුවන්නන්.සිද්ධිය සම්බන්ධයෙන් නෝර්වුඩ් පොලිසිය පරීක්ෂණ සිදු කරමින් පවතිනවා.
