නිලධාරිනියන් දෙදෙනෙක් කූඨ ලේඛන වලින් ගෙනා වාහන ගැන අනාවරණයක්

වර්තමාන ‍ශ්‍රී ලංකා රක්ෂණ නියාමන කොමිෂන් සභාවේ ඉහළ තලයේ නිළයන් දරණ නිලධාරිනියන් දෙදෙනෙකු විසින් කූඨ ලේඛන සකසා වංචා සහගත ලෙස තීරු බදු සහන සහිත වාහන ආනයන බලපත්‍ර ලබා ගනිමින් වාහන දෙකක් ආනයනය කිරීම සම්බන්ධයෙන් විධිමත් පරීක්ෂණයක් කරන ලෙසට ඉල්ලා මගෙන් රටට සංවිධානයේ සභාපති සංජය මහවත්ත විසින් කොළඹ අපරාධ පරීක්ෂණ දෙපාර්තමේන්තුව වෙත පසුගිය දා පැමිණිල්ලක් ඉදිරිපත් කර තිබෙනවා.

වර්ෂ 2011 දී වංචනික ලෙස තම සේවා කාලයන් සහ තනතුරු සඳහන් කොට නීත්‍යානුකූලව හිමි නොවන සහනයක් ලබාගැනීම සඳහා වෙළඳ තීරුබදු හා ආයෝජන ප්‍රතිපත්ති දෙපාර්තමේන්තුව චේතනාන්විතව නොමග යවමින් තීරුබදු සහන සහිත වාහන ආනයන බලපත්‍ර මෙම නිලධාරිනියන් දෙදෙනා විසින් ලබාගෙන ඇතැයි සංජය මහවත්ත පවසනවා.

තීරුබදු සහන සහිත වාහන ආනයන බලපත්‍රයක් සඳහා අයදුම් කිරීමට 2010/12/10 දිනැති අංක 01/2010 දරන හා 2010/12/24 දිනැති අංක 01(1)/2010 දරන වෙළඳ, තීරුබදු හා ආයෝජන ප්‍රතිපත්ති දෙපාර්තමේන්තුවේ චක්‍රලේඛවල පිළිවෙලින් 1(g) සහ 02 වගන්ති අනුව වෙනත් නියාමන ආයතනයක ජ්‍යෙෂ්ඨ මට්ටමේ විධායක නිලයක අවුරුදු 12ක ක්‍රියාකාරී සේවා කාලයක් සම්පූර්ණ කර තිබිය යුතු බව පවසන සංජය මහවත්ත, කළමණාකරණ සේවා දෙපාර්තමේන්තුවේ චක්‍රලේඛවලට අනුව “ජ්‍යෙෂ්ඨ මට්ටමේ” විධායක තනතුරු ලෙස සැලකෙන්නේ MM, AR සහ HM වැටුප් කාණ්ඩවලට අයත්වන රජයේ නිලධාරීන් බවද මෙම නිලධාරිනියන් දෙදෙනා කලින් දැරූ කණිශ්ඨ තනතුරු දෙක (විධායක සහ ජ්‍යෙෂ්ඨ විධායක යන තනතුරු) කළමණාකරණ සේවා දෙපාර්තමේන්තුවේ ‍ චක්‍රලේඛවලට අනුව “ජ්‍යෙෂ්ඨ මට්ටමේ” තනතුරු ලෙස සැලකෙන්නේ නැති බවද පවසා සිටියා.

තවද, ශ්‍රී ලංකා රක්ෂණ නියාමන කොමිෂන් සභාවේ පරිපාලන අත්පොතෙහි පිටු අංක 30හි සඳහන් අභ්‍යන්තර උසස්වීම් ලබාදීමේ පටිපාටියට අනුවද මෙකී තනතුරු දෙක සැලකෙන්නේ කණිෂ්ඨ තනතුරු ලෙසටය .

තත්ත්වය එසේ තිබියදී 2011 වර්ෂය වන විට අදාළ නිලධාරිනියන් දෙදෙනා එකී සේවා කාලය සපුරා නොතිබීම හේතුවෙන් සේවා කාලය සම්පූර්ණ කර පෙන්වීම සඳහා එම නිලධාරිනියන් දෙදෙනා පෙර දරණ ලද කනිෂ්ඨ තනතුරු (විධායක නිලයක් නොවන) ඇතුළත් කරමින් තම තනතුරු මෙන්ම සේවා කාලයන් ද වංචා සහගත ලෙස දක්වමින් අයදුම්පත්‍ කූඨ ලෙස සකසා වෙළඳ තීරුබදු හා ආයෝජන ප්‍රතිපත්ති දෙපාර්තමේන්තුව (Trade, Tariff and Investment Policy Department) චේතනාන්විතව නොමඟ යවා තීරුබදු සහන සහිත වාහන ආනයන බලපත්‍ර ලබාගෙන එම ආනයන බලපත්‍ර මගින් KIA sportage සහ KIA sorento මාදිලියේ වාහන දෙකක් මෙලෙස වංචනික ලෙස මෙම නිලධාරිනියන් දෙදෙනා ආනයනය කර රජයේ බදු මුදල් වංචා කිරීමෙන් රජයට අයවිය යුතු බදු මුදල් විශාල ප්‍රමාණයක් අහිමි වී ගොස් ඇතැයි මගෙන් රටට සංවිධානයේ සභාපතිවරයා වැඩිදුරටත් පැවසුවේ.