ගනේමුල්ල සංජීව ඝාතනයට අදාළව මේ වන විට (26) බන්ධනාගාර දෙපාර්තමේන්තුව විසින් සිදු කරන විමර්ශනවලට අනුව නිලධාරින් ඇතුළු 15 දෙනෙකුගෙන් ප්‍රකාශ සටහන් කරගෙන ඇති බව වාර්තා වනවා.
පොලීසිය සහ පොලිස් විශේෂ කාර්ය බළකාය නිලධාරීන්ගෙන් මෙන් ම ගනේමුල්ල සංජීව උසාවියට රැගෙන එම සිදු කිරීම සම්බන්ධයෙන් වගකීම දැරු නිලධාරියාගෙන් ද ප්‍රශ්න කර ඇති බවයි වාර්තා වන්නේ.
තවත් 15 දෙනෙකුගෙන් ප්‍රශ්න කිරීම් සිදු කිරීමට නියමිත ව තිබෙනවා.
මෙම විමර්ශන කටයුතු සහකාර බන්ධනාගාර අධිකාරීවරයෙකුගේ අධීක්ෂණය යටතේ සිදුවනවා.
උසාවියට ගෙන ඒමට පෙර ගනේමුල්ල සංජීව සිටි සිරමැදිරියේ තිබී ජංගම දුරකථනයක් ද හමු ව තිබෙන අතර එය ද මේ වනවිට විමර්ශන සඳහා භාරකර ඇති බවයි වාර්තා වන්නේ.
මේ අතර සංජීව ඝාතනයෙන් පසු අතුරුදන් ව සිටින මෙම සිද්ධිය මහමොළකාරිණිය ලෙස සැලකෙන ඉෂාරා සෙව්වන්දි විසින් රැගෙන එන ලද ගිනි අවිය අපරාධ නඩු විධාන සංග්‍රහය ග්‍රන්ථයේ ඇතුළත සූක්ෂ්ම අයුරින් කපා එහි බහා ඇත්තේ ඇයගේ සොහොයුරා බවට හෙළි ව තිබෙනවා.
එමෙන්ම ඇයගේ සොහොයුරා හට ද විදෙස්ගත ව සැඟවී සිටින කෙසෙල්බද්දර පද්මේ නමැත්තා විසින් වරින් වර මුදල් තැන්පත් කරන ලද බවත් හෙළි ව ඇති බවයි පොලිසිය පවසන්නේ.
තව ද, වෙඩික්කරු වන කොමාන්ඩෝ සමිදු සහ ඉෂාරා අතර සමීප ඇසුරක් තිබී ඇති බවත් ඔවුන් ඝාතනයට පෙර දිවුලපිටිය ප්‍රදේශයේ වෙළෙඳසැලකින් අත්‍යවශ්‍ය ආහාරපාන ද ලබාගෙන ඇති බවත් සඳහන්.
ඔවුන් ළැඟුම්හලට පිටත් ව යාමට පෙර රාජ්‍ය බැංකුවකින් රුපියල් 50000ක මුදලක් ද ලබාගෙන ඇති බවයි සිදු කළ විමර්ශනවලින් හෙළි ව ඇත්තේ.
කෙසේවෙතත් මෙම සිද්ධියට ආධාර අනුබල දීමේ චෝදනා මත ඉෂාරා සෙව්වන්දිගේ මව සහ සොහොයුරා එළඹෙන 07 වැනි දා තෙක් රක්ෂිත බන්ධනාගාරගත ද කෙරුණා.
