2025 ඉන්දීය ප්‍රීමියර් ලීග් ක්‍රිකට් තරගාවලියේ (IPL) ලක්නව් සුපර් ජයන්ට්ස් කණ්ඩායමේ (LSG) නායකත්වයට කඩුලු රකින්නෙකු වන රිෂාබ් පාන්ට් නම් කිරීමට නියමිත ව තිබෙනවා.
මීට පෙර මෙම කණ්ඩායමේ නායකත්වය හිමිවූයේ කේ.එල්. රාහුල් හට යි.
නමුත් ඔහු ව තරගාවලිය සඳහා පසුගිය නොවැම්බර් මස පැවති වෙන්දේසියේ දී රඳවා නොගත් ක්‍රීඩකයෙකු ලෙසයි සැලකුණේ.
පසුගිය වසරේ අග භාගයේ දී නිමාවට පත් වූ මෙගා වෙන්දේසියේ මිල අධික ම ක්‍රීඩකයා ලෙස සැලකුණු රිෂාබ් පාන්ට් ඉන්දීය රුපියල් කෝටි 27කට (අමෙරිකානු ඩොලර් මිලියන 3.21)කට ලක්නව් කණ්ඩායම විසින් මිලට ගනු ලැබුවා.
පසුගිය වසර දෙක තුළ ම ලක්නව් හි නායකත්වය ගෙන කටයුතු කළේ කේ. එල් රාහුල් වන අතර ඔහුගේ නායකත්වයෙන් යුත් කණ්ඩායමට වාර දෙකෙහි ම අවසන් මහා තරගයට පිවිසීමටවත් නොහැකි වුණා.
එහි සුවිශේෂීත්වය වන්නේ 2024 වර්ෂයේ දී ඉන්දීය ප්‍රීමියර් ලීග් තරග ප්‍රසාද ලකුණු සටහනේ ලක්නව් සුපර් ජයින්ට්ස් කණ්ඩායම 7 වැනි ස්ථානය දක්වා පසුබැසීමයි.
රිෂාබ් පාන්ට් ඉන්දීය ප්‍රීමියර් ලීග් ඉතිහාසයේ කණ්ඩායමක් වෙනුවෙන් නායකත්වය දරන දෙවැනි අවස්ථාව මෙය වනවා.
මීට පෙර ඔහු දිල්ලි කැපිටල්ස් වෙනුවෙන් පෙනී සිටියා.
ලක්නව් සුපර් ජයින්ට්ස් වෙනුවෙන් වෙන්දේසියේ දී ක්‍රීඩකයින් පස්දෙනෙකු රඳවා ගත් අතර රිෂාබ් පාන්ට්ට අමතර ව නිකලස් පූරන්, රවී බිෂ්නෝයි, මායන්ක් යාදව්, ආයුෂ් බඩෝනි සහ මොහ්සින් ඛාන් මේ අතර වනවා.
