ඉස්ලාම් දහමට අපහාස කිරීමේ චෝදනාවට වරදකරු වී කොළඹ අතිරේක මහේස්ත්‍රාත් අධිකරණයේ නියෝගය පරිදි මාස 09ක ලිහිල් සිර දඬුවම් නියම වී සිටින බොදු බල සේනා සංවිධානයේ ලේකම් ගලගොඩඅත්තේ ඥානසාර හිමියන්ගේ සිර දඬුවමට එරෙහිව කොළඹ මහාධිකරණය හමුවේ අභියාචනයක් අද (09) දහවල් ඉදිරිපත් කෙරුණා.
කොළඹ මහාධිකරණයට යොමු කෙරුණු එකී අභියාචනය අද පස්වරුවේ කොළඹ මහේස්ත්‍රාත් අධිකරණය හමුවේ ගොනුකරනු ලැබුවා.
එම අභියාචනා පෙත්සම පදනම් කරගෙන ඥානසාර හිමියන් ඇප මත මුදාහරින ලෙසට ඉල්ලා ඇප අයදුම් පත්‍රයක් ද කොළඹ මහේස්ත්‍රාත් අධිකරණයට ඉදිරිපත් කළා.
එය සලකා බැලු අතිරේක මහේස්ත්‍රාත් පසන් අමරසේන මහතා එම ඇප ඉල්ලීම ප්‍රතික්ෂේප කළා.
ශ්‍රී ජයවර්ධන පුර රෝහලෙන් ප්‍රතිකාර ලබා ගත යුතු ඇති බවත් දඬුවම් කාලය වන මාස 09 මාස හයකින් පමණ ගෙවී යන බැවින් අභියාචනාවක් විභාගයට ගැනීමට කාලයක් නොමැති බවට සුවිශේෂී කරුණු ලෙස නීතිඥවරු ඉදිරිපත් කළ අතර එම කරුණු මත පදනම්ව ඇප දීමට නොහැකි බව අතිරේක මහේස්ත්‍රාත්වරයා පෙන්වා දුන්නා.
එහිදී අතිරේක මහේස්ත්‍රාත් වරයා වැඩිදුරටත් සඳහන් කළේ ප්‍රතිකාර ලබා ගැනීමට අවශ්‍ය නම් එය බන්ධනාගාර රෝහලෙන් ලබා ගත හැකි බවයි.
