මීගලෑව රැස්වෙහෙර රජමහා විහාරස්ථානයට පසුගිය 6 වැනිදා උදේ භික්ෂුවක විලසින් වෙස්වළාගෙන ඇතුළු වීමට උත්සහා කළ පුද්ගලයා විහාරස්ථානය අසලට යතුරුපැදියක නංවාගෙන පැමිණි බව කියන තරුණයා ඊයේ අත්අඩංගුවට ගෙන තිබෙනවා. එම යතුරුපැදිය ද පොලිස් බාරයට ගත් බවයි ජ්‍යෙෂ්ඨ පොලිස් නිළධාරියෙක් සඳහන් කර තිබුණේ.
තමා රාජාංගණයේ සිට වීරඹුගෙදර ප්‍රදේශය බලා යතුරුපැදියෙන් ගමන් කරන අවස්ථාවේ ගල්ගමුව ප්‍රදේශයේදී භික්ෂුවක් යතුරුපැදිය නතර කරවාගෙන එයට ගොඩ වූ බව අත්අඩංගුවට ගත් තරුණයා පැවසූ බවයි පොලිසිය සඳහන් කළේ.
තමා රැස්වෙහෙර රජමහා විහාරස්ථානය අසළට රැගෙන යන ලෙස භික්ෂුව පැවසූ බව ද පොලිස් බාරයට ගත් තරුණයා සඳහන් කර තිබුණා.
රැස්වෙහෙර විහාරස්ථානය ඉදිරිපිටින් බස්සවා භික්ෂුවට වැඳ පිටත්ව ගිය බව ද ඔහු කියනවා.
රජමහා විහාරස්ථානයේ සවිකර තිබූ සීසීටීවී කැමරාවක රූප රාමු පරීක්ෂා කර බලා භික්ෂු වෙස්ගත් පුද්ගලයා පැමිණී යතුරුපැදියේ අංකය ඔස්සේ පරීක්ෂණ පවත්වා මේ තරුණයා පොලිස් බාරයට ගත් බවද පොලිසියේ ප්‍රකාශයක් සඳහන් කළා.
තරුණයාගෙන් සිද්ධියට අදාළව ප්‍රකාශයක් ලබාගෙන පසුව ඔහු මුදාහැරිය බව පොලිසිය පැවසුවා.
භික්ෂුවක ලෙස වෙස්වළාගත් මේ පුද්ගලයාගෙන් රජමහා විහාරාධිපති හිමියන් ප්‍රශ්න කළ අවස්ථාවේ ඔහු ඇඳ සිටි සිවුර හා අඳනකඩය උනා දමා පොහොර උරයකින් නිරුවත වසාගෙන අසළ තිබූ කැලෑවකට පලා ගොස් තිබෙනවා.
පලාගිය පුද්ගලයා ගැන මෙතෙක් කිසිදු තොරතුරක් හෙළි වී නැහැ.ශ්‍රීනාත් ප්‍රසන්න ජයසූරිය
“ලංකාදීප” පුවත්පත…
